Prezıdenttiń Teleradıokesheni mamandaryna úzdik fılm úshin halyqaralyq marapat tabystaldy

ASTANA. QazAqparat – QR Prezıdenti Teleradıokesheniniń ujymy daıyndaǵan «Kaspıı ıtbalyǵy nelikten ólip jatyr?» derekti fılmi aqpanda ótken «Zılant» kınofestıvalinde úzdik atanǵan bolatyn. Al búgin atalǵan syılyq elordaǵa jetkizilip, týyndyny daıyndaǵan mamandarǵa tabystaldy, dep habarlaıdy QazAqparat tilshisi.

Derekti fılmde sońǵy 100 jylda Kaspıı ıtbalyǵynyń popýlıatsııasy 90% deıin azaıǵany, olardyń qyrylý sebepteri baıandalǵan. Aıta keteıik, osydan 3 jyl buryn Kaspıı ıtbalyǵy Qazaqstannyń Qyzyl kitabyna engizildi.

Bul rejısser Aqylbek Shaljanovtyń QR Prezıdentiniń Teleradıokesheninde qyzmet etken jyldarynda alǵan halyqaralyq deńgeıdegi alǵashqy marapaty. Derekti fılmdi daıyndaýǵa shamamen jarty aı ýaqyt ketken.

«Birinshiden, bul – bizdiń eńbegimizdiń baǵalanǵany. Ekinshiden, osy fılm arqyly máseleni halyqqa jetkizgimiz keldi. Bul TMD elderiniń ókilderi qatysqan aýqymdy festıval. Marapat tek meniń emes - búkil komandanyń eńbegi. Oǵan stsenarıı avtory - Konstantın Harlamov, operatorlar toby, ıtbalyqtardy zertteý ortalyǵynyń qyzmetkerleri atsalysty. Birlese zertteý júrgizdik jáne «Kaspıı ıtbalyǵy nelikten ólip jatyr?» degen suraqqa jaýap tabýǵa tyrystyq. Jalpy biz úshin eń basty marapat – bul problemanyń kórermen sanasyna jetkenin seziný», - dedi rejısser Aqylbek Shaljanov «QazAqparat» tilshisiniń saýalyna jaýap bere otyryp.

«Zılant» halyqaralyq kınofestıvali 25-26 aqpan aralǵynda Qazan qalasynda ótti. Onyń maqsaty - álem elderiniń shyǵarmashylyq ujymdarymen tájirıbe almasý, balalar men jastardyń oı-órisi men zııatkerlik deńgeıin keńeıtý.