Prezıdenttiń tapsyrmasy boıynsha Almaty ákimi ushaq apatynan zardap shekken balalarǵa bardy

ALMATY. QazAqparat – El Prezıdenti Qasym-Jomart Toqaevtyń tapsyrmasy boıynsha Almaty qalasynyń ákimi Baqytjan Saǵyntaev ushaq apatynan zardap shekken balalarǵa bardy, dep habarlaıdy QazAqparat tilshisi.

Baqytjan Saǵyntaev ushaq apatynan zardap shekken toǵyz bala jatqan Balalar shuǵyl medıtsınalyq járdem ortalyǵyna bardy.

Qala ákimi balalardyń jaǵdaıymen tanysyp, olarǵa Prezıdent Qasym-Jomart Toqaevtyń atynan jańajyldyq syılyqtar tapsyryp, olardyń tez saýyǵýyna tilek bildirdi.

Ortalyqtyń bas dárigeri Abaı Qusaıynovtyń aıtýynsha, alty bala ıntensıvti terapııa bólimine jetkizildi. Olardyń jaǵdaıy ortasha aýyr deńgeıde. Ekeýine emdeýdiń joǵary tehnologııaly zamanaýı ádisterin qoldana otyryp ota jasaldy. Ota jasalǵandardyń búgingi jaǵdaıy ortasha aýyr deńgeıde.

Qazirgi ýaqytta balalardyń barlyǵy profılaktıkalyq bólimge aýystyryldy. Onda olar qajetti medıtsınalyq kómek alýda.