Prezıdenttiń saıası reformalary qalaı júzege asyrylýda
«2019 jyldyń jeltoqsan aıynda Ulttyq qoǵamdyq senim keńesiniń ekinshi otyrysynda QR Prezıdenti Qasym-Jomart Toqaev birqatar mańyzdy saıası bastamalardy jarııa etip, atalǵan bastamalardy iske asyrý jóninde tıisti jospar qabyldanǵan bolatyn. Bul jumysqa Ulttyq keńes músheleri de at salysýda.
Sonymen, mańyzdy bastamalardyń biri beıbit jınalystar týraly qazaqstandyq zańnamany ózgertý bolyp tabylady. «Beıbit jınalystar uıymdastyrý jáne ótkizý tártibi týraly» jańa Zańnyń jobasy qazir Parlament Senatynyń qaraýynda.
«Qazaqstan Respýblıkasyndaǵy saılaý týraly» Konstıtýtsııalyq zańǵa tolyqtyrýlar engizý týraly» Konstıtýtsııalyq zańnyń jáne «Saıası partııalar týraly» Zańǵa ózgeris pen tolyqtyrýlar engizý týraly» Zańnyń jobalaryn Májilis ótken aptada maquldap, qazirgi kezde Parlament Senatynyń qaraýyna tústi» - dep jazady Erlan Qarın jelidegi paraqshasynda .
Sondaı-aq, Erlan Qarın Parlamenttik oppozıtsııa ınstıtýtyn engizýdi kózdeıtin «QR Parlamenti jáne onyń depýtattarynyń mártebesi týraly» QR Konstıtýtsııalyq zańyna tolyqtyrýlar engizý týraly» QR Zańynyń jobasy Parlament Májilisine engizilgenin jetkizdi.
«Qylmystyq kodekstiń 130-babyn krımınalsyzdandyrý jáne 174-bapqa ózgerister engizý boıynsha túzetýler Parlament Májilisiniń depýtattary bastamashylyq jasaǵan «Qazaqstan Respýblıkasynyń keıbir zańnamalyq aktilerine atqarýshylyq is júrgizý máseleleri boıynsha ózgerister men tolyqtyrýlar engizý týraly» Zań jobasyna engizildi. Qazirgi ýaqytta zań jobasy Parlament Májilisinde qaralyp jatyr.
Bas prokýratýra, UQK, ІІM jáne Qarjy mınıstrligi «Qazaqstan Respýblıkasynyń keıbir zańnamalyq aktilerine qylmystyq jolmen alynǵan kiristerdi zańdastyrýǵa jáne terrorızmdi qarjylandyrýǵa qarsy is-qımyl máseleleri boıynsha ózgerister men tolyqtyrýlar engizý týraly» Zań jobasyn ázirledi. Atalǵan zań jobasy sheńberinde buryn QR QK 174-baby boıynsha sottalǵan jáne quqyq qorǵaý men arnaıy memlekettik organdardyń oń qorytyndysy bar bosatylǵandarǵa qatysty shekteýlerdi jeńildetýge baǵyttalǵan sharalar kózdelgen. Qazirgi ýaqytta Zań jobasy Parlament Senatynyń qaraýynda», - dep tolyqtyrdy ol.
