Prezıdenttiń saıası reformalar toptamasy plıýralızm ıdeıasyn iske asyrýǵa jaǵdaı jasaıdy - sarapshy

NUR-SULTAN. QazAqparat - Prezıdenttiń saıası reformalar toptamasy plıýralızm ıdeıasyn ómirde iske asyrý úshin jaǵdaı jasaıdy. Mundaı pikirdi QR Parlamenti Senatty apparaty basshysynyń orynbasary Maksım Spotkaı bildirdi, dep habarlaıdy QazAqparat tilshisi.

«Taıaýda, aldaǵy sársenbi kúni Ulttyq qoǵamdyq senim keńesiniń kezekti otyrysy ótedi. Osynaý sátke ulttyq keńes baıypty nátıjemen kelip otyr. Bul - búgin Memleket basshysy qol qoıǵan zańdar jáne taǵy birqatar zań osy aptada Senatta qaralatyn bolady», - dedi ol.

Onyń atap ótýinshe, atalǵan zańdar osyǵan deıin ótken Ulttyq qoǵamdyq senim keńesi otyrystarynda Prezıdent Qasym-Jomart Toqaev jarııa etken saıası reformalar toptasynyń júzege asyryla bastaǵandyǵyn bildiredi.

«Іs júzine kelgende, Ulttyq keńes qyzmetine túrli kózqaraspen qaraýǵa bolady. Degenmen, faktiler ózdiginen-aq sóılep tur. Qoǵamnyń, qazaqstandyqtardyń suranysyna jaýap bere alatyn, qoǵam kótergen saıası reformalar toptamasy búginde júzege asyrylyp jatyr. Bul otandyq zańnamadaǵy barynsha baıypty ózgerister deýge de bolady. Atap aıtar bolsaq, jańa partııa qurý úshin tirkeý shegi 2 ese tómendetilip, jastar men áıelderge arnalǵan kvota engizilip otyr. Jalpy, aldaǵy parlamettik saılaýlardan keıin jańa saıası shynaıylyqty kóretin bolamyz. Prezıdent qol qoıǵan barlyq zańdar, tolyqtaı alǵanda Qasym-Jomart Toqaevtyń saıası reformalar toptamasy saıası keńistikte plıýralızm ıdesin ómirde shynaıy iske asyrýǵa jaǵdaı jasaıdy», - dedi Maksım Spotkaı.

Buǵan deıin Memleket basshysy «Qazaqstan Respýblıkasynda beıbit jınalystardy uıymdastyrý jáne ótkizý tártibi týraly» Qazaqstan Respýblıkasynyń Zańyna qol qoıǵanyn habarlaǵan edik.