Prezıdenttiń referendýmǵa barmaǵandyǵynyń ózi úlken erlik - Májilis depýtaty
ASTANA. 3 aqpan. QazAqparat /Aıdar Ospanalıev/ - Májilis depýtaty Amangeldi Momyshevtyń pikirinshe, Prezıdenttiń referendýmǵa barmaǵandyǵynyń ózi úlken erlik.
Bul týraly ol búgin Parlament Májilisiniń jalpy otyrysynan soń jýrnalısterge bergen suhbatynda málim etti.
Halyq qalaýlysynyń pikirinshe, Prezıdenttiń referendým ótkizbeı kerisinshe, kezekten tys saılaý ótkizýi, halyqtyń qamyn oılaǵandyǵy. «Bul bizdiń bolashaq urpaqtarǵa úlken ónege bolady degen oıdamyn. Búgin biz «Qazaqstan Respýblıkasynyń keıbir konstıtýtsııalyq zańdaryna tolyqtyrýlar men ózgerister engizý týraly» zań jobasyn maquldadyq. Referendým ótkizý jónindegi bastamany 5 mıllıonnan astam qazaqstandyq qoldaǵan bolatyn. Aldaǵy ýaqytta Prezıdent saılaýy ótip jatsa, osy azamattardyń barlyǵy da Elbasymyzǵa daýys beredi degen oıdamyn», - dedi depýtat.
