Prezıdenttiń Parlamentti taratýyna qatysty kezekten tys saılaý ótkiziletin merzimder naqtylandy - Senat
ASTANA. 12 qyrkúıek. QazAqparat - Búgin QR Parlamenti Senatynyń jalpy otyrysynda «Qazaqstan Respýblıkasynyń keıbir konstıtýtsııalyq zańdaryna konstıtýtsııalyq merzimderdi esepteý máseleleri boıynsha ózgerister men tolyqtyrýlar engizý týraly» zańy qabyldandy.
Parlament qabyldaǵan qujat Memleket basshysynyń qol qoıýyna joldanady.
Atalǵan qujat Konstıtýtsııalyq merzimderdi esepteý máselesi boıynsha QR Konstıtýtsııalyq Keńesiniń 2012 jylǵy qaýlysyn iske asyrý maqsatynda ázirlengen. Bul rette zań jobasynyń maqsaty konstıtýtsııalyq merzimderdiń bastalýyn jáne aıaqtalýyn esepteý tártibin belgileý bolyp tabylady. Al Ádilet mınıstri Berik Imashevtyń aıtýynsha, QR Konstıtýtsııasynda barlyq jaǵdaılarda onda kórsetilgen merzimderdi esepteýdiń bastalýy men aıaqtalýy belgilenbeıdi jáne qandaı kúnnen nemese oqıǵanyń bastalýynan merzimdi esepteý sharalary naqtylanbaǵan. Osyǵan oraı, Konstıtýtsııalyq Keńestiń resmı túsindirýimen birqatar zań normalaryna konstıtýtsııalyq merzimderdiń bastalýy men aıaqtalýyn esepteý tártibin belgileý usynylady.
«Atap aıtqanda, «Qazaqstan Respýblıkasyndaǵy saılaý týraly» konstıtýtsııalyq zańnyń 69-babynyń 3-tarmaǵy ekinshi bólikpen tolyqtyrylady. Onda Respýblıka Prezıdentiniń Parlamentti taratý týraly aktisi qoldanysqa engizilgen kún depýtattardyń kezekten tys saılaýy ótkizilýi tıis merzimniń bastalýy kezi bolyp tabylatyndyǵy kózdeledi. Bul merzim eki aı ótken soń aıaqtalady. Eger merzimniń aıaqtalýyna tıisti kún belgilenbegen aıǵa týra keletin bolsa, onda merzim osy aıdyń sońǵy kúninde aıaqtalady», - deıdi mınıstr Berik Imashev.
