Prezıdenttiń ózi habarlasyp quttyqtaıdy dep oılamaǵan edim – jas tennısshi Alan Qurmanǵalıev
NUR-SULTAN. QazAqparat – Búgin astanalyqtar ústel tennısinen Azııa chempıonatynyń júldegeri Alan Qurmanǵalıevti elorda áýejaıynan qarsy aldy, dep habarlaıdy QazAqparat tilshisi.
Jankúıerler men jalpy sport súıer jurtshylyq jas tennısshini áýejaıdan shashý shashyp, dombyramen án aıtyp, erekshe kóńil-kúımen qarsy aldy.
«Meni osylaı saltanatpen kútip alyp, keremet qurmet kórsetilip jatqanyna óte qýanyshtymyn. Osynsha halyq bolady dep kútpegen edim. Bári keremet! Taıaýdaǵy josparǵa kelsek, Almatyda ústel tennısinen halyqaralyq týrnır ótedi, sonda baq synaımyn. Azııa chempıonatyna deıin birneshe ret respýblıkalyq jáne halyqaralyq týrnırlerge qatysyp, jeńiske jetkenmin. Degenmen bul jarystyń jóni bólek», - dedi Alan Qurmanǵalıev tilshilerge suhbat bere turyp.
Sózine qaraǵanda, 15 jastaǵy qaraǵandylyq jasóspirim ústel tennısimen 8 jasynan beri aınalysyp keledi.
Sondaı-aq jas tennısshi QR Prezıdenti Qasym-Jomart Toqaevtyń jeke quttyqtaýy kútpegen syı bolǵanyn aıtty.
«Basqa-basqa Prezıdenttiń ózi habarlasyp quttyqtaıdy dep kútpedim. Jeńisimmen quttyqtap, daıyndyqty odan ári jalǵastyryp, osy betimnen qaıtpaı, iri jeńisterge jete berýime tilek bildirdi. Bul maǵan aldaǵy maqsattaryma jetýge úlken jiger, jarqyn jetistikterdi baǵyndyrýǵa kóp kúsh beredi», - deıdi ol.
Eske salsaq, Laosta ótken jasóspirimder men kadetter arasyndaǵy ústel tennısinen Azııa chempıonatynyń qola júldegeri Alan Qurmanǵalıevti Memleket basshysy Qasym-Jomart Toqaev telefon arqyly quttyqtaǵan edi.
