Prezıdenttiń Ózbekstanǵa sapary Ortalyq Azııa vektorynyń mańyzdy ekenin kórsetti - sarapshy

NUR-SULTAN. QazAqparat - QR Prezıdenti Qasym-Jomart Toqaevtyń Ózbekstan Respýblıkasyna memlekettik sapary baýyrlas memleketpen yntymaqtastyqtyń jańa qarqynmen damýyna jol ashady. Bul pikirdi «Ekonomıkalyq zertteýler ınstıtýty» AQ Taldaý jáne álemdik ekonomıka ortalyǵynyń dırektory Aıbol Arǵynǵazınov bildirdi, dep habarlaıdy QazAqparat.

«Prezıdenttiń alǵashqy memlekettik saparyn Ózbekstannan bastaýy Qazaqstannyń syrtqy saıasaty úshin Ortalyq Azııa vektorynyń mańyzdy ekenin kórsetedi. Qos taraptyń birlesken málimdeme qabyldaýy, memlekettik sapardyń sátti ótýi Ózbekstan tarapynyń da ózara yntymaqtastyqqa múddeliligin kórsetip otyr. Ózbekstan da Qazaqstanmen birge Ortalyq Azııanyń kún tártibin qalyptastyrýshy memleket bolǵandyqtan, ortaq tarıhymyz men týysqandyǵymyzdy eskerip, bir keńistikte turaqty damý - eki memleket úshin de mańyzdy», - dedi sarapshy QazAqparat tilshisine bergen suhbatynda.

Shekaralas eki memleket úshin de transshekaralyq saýda, óńirlik ıntegratsııa, transshekaralyq sý kózderin ortaq paıdalaný máseleleri mańyzdy.

«Qol jetkizilgen kelisimder ózara saýda aınalymyn 5 mlrd AQSh dollaryna deıin jetkizýge, otandyq eksport kólemin arttyrýǵa, saýda-ekonomıkalyq yntymaqtastyqty odan ári nyǵaıtýǵa septigin tıgizedi. Sonymen birge, óz aýmaǵynda turatyn ekinshi tarap ókilderiniń etnıkalyq, tildik jáne ulttyq mádenıetterin saqtaý men damytý Ózbekstandaǵy otandastarymyzdyń ulttyq tamyrynan ajyramaýyna múmkindik beredi. Osy rette Qazaqstanda turatyn ózbek halqynyń ókilderi úshin ózbek tilindegi ulttyq mektepter, merzimdi basylymdar, ózbek drama teatry jumys istep turǵanyn atap ótken abzal», - dep óz sózin jalǵastyrdy ol.

Ózbekstandaǵy Qazaqstan jylynyń bastaý alýy baýyrlas ózbek halqynyń Qazaqstannyń baı ádebı-mádenı murasyn, ónerin keńinen tanyp-bilýine kómektesedi.

«Qoryta kelgende, Memleket basshysynyń Ózbekstanǵa memlekettik sapary eki eldiń saýda-ekonomıkalyq, gýmanıtarlyq baılanystarynyń keńeıýine, óńirlik ıntegratsııanyń jańasha qarqynmen damýyna yqpal etedi», - dedi A. Arǵynǵazınov.