Prezıdenttiń onlaın-kazınolar jarnamasyna eshqandaı qatysy joq - Berik Ýálı

NUR-SULTAN. QazAqparat - QR Prezıdenti Qasym-Jomart Toqaevtyń baspasóz hatshysy Berik Ýálı Memleket basshysy sýretiniń onlaın-kazınolardyń jarnamasyna qoldanylýyna qatysty resmı málimdeme jasady, dep habarlaıdy QazAqparat tilshisi.

«Áleýmettik jelilerdegi Prezıdent Qasym-Jomart Toqaevtyń beınesi bar onlaın-kazınonyń jarnamasyna baılanysty maǵan buqaralyq aqparat quraldarynan shaǵymdar kelip túsýde.

Memleket basshysynyń bul jarnamaǵa eshqandaı qatysy joq ekenin, al onyń sýreti zańsyz paıdalanylǵanyn resmı túrde málimdeımin. Bul – ótirik ári jónsiz jarnama. Bizdiń pikirimizshe, mundaı jarııalanymdar áleýmettik jeli qoldanýshylaryn jańylystyrady jáne abyroı-bedeline aıtarlyqtaı nuqsan keltiredi», - dep jazdy Berik Ýálı Facebook-tegi paraqshasynda.

Osy rette ol bul máselemen quqyq qorǵaý organdary aınalysyp, jarnama berýshilerdi anyqtaý arqyly olardy jaýapkershilikke tartý máselesin sheshetindigine úmit artatyndyǵyn atap ótedi.

«Barlyq áleýmettik jelini kommertsııalyq jarııalanymdardy ornalastyrý isine úlken jaýapkershilikpen qaraýǵa jáne bireýdiń fotosynyń nemese basqa da sýretterdiń zańsyz paıdalanylýyna jol bermeýge shaqyramyn», - dedi Memleket basshysynyń baspasóz hatshysy.

Foto: https://twitter.com