Prezıdenttiń ókilettigin óz yqylasymen berýi - tarıhta sırek kezdesetin oqıǵa - Beısenbaev
«Qazaq eli Táýelsizdiktiń shırek ǵasyryn abyroıly eńserdi. Búgin birligi jarasqan halqymyz bar. Álem elderi moıyndaǵan eńseli, bedeldi memleketimiz bar. Táýelsizdiktiń 25 jylynda atqarylǵan jetistikterdiń qazirgi saıası júıeniń jemisi ekendigi bárimizge anyq. Alaıda álem kóz aldymyzda ózgerip jatyr. Aýmaly-tókpeli álem ózgeristi qajet etedi. Ózgermegen artta qalady. Osyny tereń túsingen Elbasy tarıhı bastamaǵa jol ashty. Qazaqstannyń damýy úshin Konstıtýtsııaǵa qajetti ózgeristerdi usyndy jáne ony búkilhalyqtyq talqylaýdan ótkizýdi tapsyrdy. Talqylaýǵa qoǵamnyń barlyq ókilderi belsene qatysty jáne usynystaryn aıtyp, úndeýdi qoldady», - dedi ol.
Beısenbaevtyń atap ótýinshe, bul konstıtýtsııalyq reforma memleketimizdiń jańa tarıhyn bastaıdy jáne halqymyzdyń berekesi, yntymaǵy men beıbit ómirine kepildik beredi. Memlekettigimizdiń negizgi tiregi - prezıdenttik basqarý bıligi saqtalady.
«Qazaqstanda prezıdenttik basqarý nysany elimizdi ultaralyq arazdyqtan, saıası jáne áleýmettik daǵdarystan qorǵaǵany barshamyzǵa belgili. Sondyqtan prezıdenttik bılik nysany elimizdiń mentalıtetine, halqymyzdyń suranysyna, zaman talabyn tolyq jaýap beredi. Halyq qoldaıtyn Prezıdenttiń óz ókilettigin óz yqylasymen berýi tarıhta sırek kezdesetin oqıǵa. Álem tarıhynda zamanynan ozyp týǵan, eliniń damýyn ózgertip, qýatty memleket retinde álemdik arenaǵa shyǵarǵan sanaýly ǵana saıası qaıratker bar. Olardyń qatarynda alaqandaı Sıngapýrdy álem alybyna aınaldyrǵan Lı Kýan ıÝ, 5-shi respýblıkanyń negizin qalaǵan Sharl de Goll , jańa túrik elin damytqan Atatúrik, egemendigimizdiń shańyraǵyn kótergen, táýelsiz elimizdi kúlli álemge moıyndatqan, jańa qazaq memleketiniń arhıtektory Nursultan Ábishuly Nazarbaev. Sondyqtan Qazaqstannyń Tuńǵysh Prezıdenti Elbasymyz Nursultan Ábishuly Nazarbaevtyń tarıhı rólin Ata zańymyzǵa bekitý týraly áriptesimiz Hamenovanyń usynysyn tolyqtaı qoldaımyn», - dedi senator.
