Prezıdenttiń ókilettigin 2020 jylǵa deıin uzartý usynysyn qoldaımyn - Q.Sultanov
ANA. 6 qańtar. QazAqparat /Aıdar Ospanalıev/ - Senator Qýanysh Sultanovtyń pikirinshe, búginde saıası popýlızmniń ýaqyty ótti. Odan góri jurttyń naqty is pen nátıje kórýge yntaly ekendigin eskerý kerek. Bul týraly ol búgin Parlament Senatynyń jalpy otyrysynda bir top depýtattardyń Elbasy Nursultan Nazarbaevtyń ókilettigin uzartýǵa qatysty usynystaryn talqylaý barysynda málim etti.
Senatordyń paıymdaýynsha, tap osy turǵydan alǵanda referendýmnyń demokratııalyq aýqymy da, múmkindigi de óte mol. Referendým saılaýshylardyń memleket isine jaýapkershiligin arttyryp, halyqty ortaq múddege uıymdastyrady jáne qoǵamnyń saıası mádenıetin kóterýge yqpal etedi. «Prezıdent bekitken údemeli ındýstrııalyq-ınnovatsııalyq baǵdarlama búkil halyqtyń áleýmettik múddesine jaýap bere alatyn ulttyq ıdeıa dárejesindegi óte iri joba. Biz Prezıdenttiń ókilettigin 2020 jylǵa uzartý arqyly ózimizdiń áleýmettik, turmystyq qýatymyzdy kúsheıtip, eldiń birligin órkenıetti maqsatqa, múddege jumyldyramyz. Halyqtyń, qoǵamnyń sapasyn arttyryp, bolashaǵymyzǵa degen senimdi nyǵaıtyp, jas órken urpaǵymyzǵa jol ashamyz. Sol úshin de men Prezıdenttiń ókilettigin 2020 jylǵa deıin uzartý jónindegi usynysty qoldaımyn jáne ózgelerdi de osyǵan shaqyramyn»,- dedi Senat depýtaty.
