Prezıdenttiń «Memleket qulamaıdy» degen sózi halyqtyń kóńiline senim uıalatty

NUR-SULTAN. QazAqparat – QR Memlekettik hatshysy Erlan Qarın bir top mańǵystaýlyq turǵynnyń Prezıdenttiń halyqqa úndeýin qalaı qabyldaǵanyn aıtty, dep habarlaıdy QazAqparat tilshisi.

«Prezıdenttiń úndeýin men Mańǵystaý oblysynda júrip tyńdadym. Esimde bir sát qalypty. Qatardaǵy polıtsııa ókilderi, qarapaıym turǵyndar, bárimiz jınalyp, teledıdarǵa úńilgen edik. Demimizdi ishimizge tartyp, uıyp tyńdadyq. Sol kezde qasymdaǵy adamdarǵa qarap, kózderinen kóńilderine senim qalaı uıalap jatqanyn kórdim. Prezıdenttiń «Memleket qulamaıdy. Men astanada qalamyn» degen tanymal sózi bar ǵoı, osy sózder halyqty shabyttandyrdy. Men muny eshbir pafossyz, ıdeologııalyq maqsatpen nemese nasıhat retinde aıtyp otyrǵan joqpyn. Men adamdardyń jan dúnıesindegi sezimin, ózimniń kórgenimdi aıtyp otyrmyn. Senimdilikten bólek, naqty áreketterdiń josparyn, sheshimder týraly aıtty. Memleket degenimiz osy. Bılik degen de osy», - degen Memlekettik hatshy osy oqıǵalardyń bári el azamattarynyń sanasynda memleket degen uǵymnyń jańa túsinigi qalyptasatynyn atady.

«Men azamattarymyzdyń sanasynda jalpy memlekettiliktiń máni týraly jańa túsinik bekidi dep oılaımyn. Memleket degen biz, memleket degen – judyryqtaı jumylǵan azamattar. Buǵan deıin memleket degendi Úkimet, ákimdik sııaqty qandaı da bir memlekettik organdar dep qabyldap kelgen shyǵarmyz. Osy kúnderi ákimdikter men polıtsııa organdary ǵımarattar basyp alynyp jatqan kezde memlekettiń sımvoldary qulap jatqandaı kórindi. Biraq memleket degen árqaısymyzdyń júregimizde, sanamyzda bolyp shyqty», - dedi Erlan Qarın.