Prezıdenttiń maqalasy dúnıege Abaı kózimen qaraýǵa shaqyrady - Nesipbek Aıtuly
Memlekettik syılyqtyń laýreaty, belgili aqyn Nesipbek Aıtuly maqalada kóterilgen máselelerdiń mańyzdy ekendigin aıtyp, ony ulttyq sana tóńkerisine alyp keletin týyndy retinde baǵalady. «Qasym-Jomart Toqaevtyń «Abaı jáne XXI ǵasyrdaǵy Qazaqstan» atty maqalasy – ulttyq sanamyzǵa tóńkeris jasaǵan týyndy dep baǵalaımyn. Bul maqalany ulttyq baǵdarlamanyń ózegi deýge bolady. Prezıdentimiz maqalasynda Abaıdyń rýhyn taný men onyń danalyq sózderin boıǵa sińirý arqyly eldiń el bolatyndyǵyn aıqyn atap ótti», - dedi ol. Sondaı-aq, aqıyq aqyn Abaı óleńderin júrekpen oqýǵa shaqyrdy. «Prezıdenttiń maqalasyn oqyp otyryp, onyń Abaıdy jastaıynan oqyp, boıyna sińirip, aqynnyń taǵylymdy oılaryn júregine uıalatqandyǵyna razy boldym. Abaıdy jattap emes, júregińmen túsinip oqý kerek. Bir sózben aıtqanda, bul maqala ár qazaqty oılanýǵa, jańarýǵa, dúnıege Abaı kózimen qaraýǵa shaqyrady», - dedi ol óz sózinde.
Jastar da maqalany oqyp, Abaı jaıly óz pikirin bildirýge asyqty. Solardyń biri – «Turan-Astana» ýnıversıtetiniń Jastar isi komıtetiniń tóraǵasy Temirlan Qaıyrjanov.
«Abaı – qazaqtyń mańdaıyna bitken úlken baq. Sebebi onyń shyǵarmalary arqyly óskeleń urpaq bilim alyp, boıyna qazaqtyń rýhanı baılyqtaryn sińirýde. Bıyl Abaı atamyzdyń 175 jyldyǵy keń kólemde toılanýda. Áleýmettik jeliler arqyly Uly aqynnyń óleńin mánerlep oqýdan Memleket basshysy tarapynan estafeta joldandy. Tek Qazaqstan kóleminde ǵana emes, shet elden de álemge tanymal óner ıeleri osy estafetany jalǵastyryp Abaı atamyzdyń óleńderin óz tilderinde oqydy. Osylaısha, Abaı atamyzdyń óleńderin qaıta bir jańǵyrtqandaı boldyq.Memleket basshysynyń óz maqalasynda uly aqyn eńbekterin elimizdiń basty murasy túsinip oqýǵa shaqyrady», - dedi Temirlan Qaıyrjanov.
Al EUÝ Jastar saıasaty ortalyǵynyń tóraǵasy Azat Teńgebaev bolsa, Abaıdyń naqyl sózderin uranǵa aınaldyryp, oıshyldyń mereıtoıyna óz úlesin qosatynyn atap ótti: «Men óz komandamdy qalyptastyrý barysynda, birge jeńiske jeteleý jolynda Abaıdyń «Ózińe sen, ózińdi alyp shyǵar aqylyń men eńbegiń eki jaqtap» degen sózin uran retinde ustanamyn. Prezıdent maqalasynda osy jyly Abaıdyń 175 jyldyq mereıtoıy halyqaralyq deńgeıde atalyp ótetindigin aıtty. Biz de soǵan úles qosýǵa tyrysamyz».
Sondaı-aq, joǵary oqý ornynyń oqytýshylary Prezıdenttiń maqalasyna qatysty oılaryn ortaǵa saldy.«Tarıhı murany saqtaýǵa baǵyttalǵan Qazaqstan Respýblıkasynyń memlekettik saıasaty – respýblıkadaǵy qazirgi saıası ahýaldyń óte mańyzdy quramdas bóligi. Memleket basshysy qabyldap jatqan sheshimder sonyń dáleli. Sondyqtan Qasym-Jomart Toqaevtyń maqalasynda kórsetilgen Abaı danalyǵynyń mańyzdylyǵyn kóterýi, ulttyq murany saqtaý qajettiligi elimizdi aldyǵa jeteleıtini sózsiz», - dedi Qazaq ekonomıka, qarjy jáne halyqaralyq saýda ýnıversıtetiniń Stýdenttermen jumys jónindegi dekany Aıgúl Muhamedjanova.
L. Gýmılev atyndaǵy Eýrazııa ulttyq ýnıversıtetiniń professory Bekjan Ábdýálıuly Prezıdent maqalasynda Abaı taǵylymy jan-jaqty zerdelengenin baıan etti: «Prezıdent maqalasynda uly oıshyldyń danalyǵyn jan-jaqty zerdelene otyryp, búgingi kúnniń qajetine jatarý joldary qarastyrylǵan. Onda Abaı álemi ultty uıystyrýshy negiz, álemge tanytýshy tulǵa, ár adamnan bastap, barsha halqymyz qýat alatyn taýsylmas rýhanı azyq retinde qarastyrylady. Ári memlekettik saıasattyń da arqa súıer altyn qorǵany ispetti, óıtkeni Abaı murasy arqyly barsha qazaq balasy rýhanı shólin qandyrady, ol arqyly qazaq álemge tanylady. Eldiń tutastyǵynan asqan bereke-birlik, odan asqan erlik, uly bolashaq joq. Abaı murasy arqyly HHІ ǵasyrdaǵy qazaq balasy óziniń ótkenimen jalǵasady, bolashaǵyna durys qadam jasaıdy».
