Prezıdenttiń Qylmystyq kodekstegi túzetýlerinde balaǵa qatysty qylmys boıynsha qatań jaza qarastyrylǵan – Serik Berkamalov

NUR-SULTAN. QazAqparat – Sotsyz jazalaýǵa kirisýdi talap etkenderdi qoldaýǵa bolmaıdy, óıtkeni QR Prezıdentiniń 2019 jyldyń jeltoqsan aıynda Qylmystyq kodekske engizgen túzetýleri balalarǵa qatysty qylmystar boıynsha qatań jazalaýǵa kepildik beredi. Osyndaı pikirdi Facebook-tegi paraqshasynda Qazaqstan zańgerler odaǵynyń elordadaǵy fılıal tóraǵasy Serik Berkamalov bildirdi, dep habarlaıdy QazAqparat.

«Búgin tańerteńgi tragedııa tek Sátbaev qalasynyń turǵyndaryn ǵana emes, bárimizdiń júregimizdi aýyrtty.

Kishkene balaǵa zorlyq jasaǵan adamdy bastapqyda ashýǵa berilip, sol jerde atyp tastaǵyń, ońbaǵandy tirideı parashalap tastaǵyń keledi. Jasyratyny joq áke retinde mende sondaı kúıde bolar edim. Bárimiz adambyz, kúdiktini óz qolymen jazalaǵasy kelgen ashýly topty túsinýge bolady, biraq qoldaýǵa bolmaıdy. Toptyń ashý-yzasynyń sebebi túsinikti, jyl saıyn osyndaı qylmys kóbeıip ketti, jaza jeńildetile berdi, al qylmysker túrmeden merziminen buryn bosatyldy. Túngi toptyń oıynda osy bolǵan shyǵar.

Alaıda kóbi Prezıdent Qasym-Jomart Toqaevtyń osy sebeppen byltyr jeltoqsan aıynda Qylmystyq kodekske jaýapkershilikti túbegeıli kúsheıtý týraly ózgerister engizýge qatysty qol qoıǵanyn bilmeıdi. Endi Qylmystyq kodekstiń 120-baby boıynsha balaǵa zorlyq kórsetýge eń joǵary jaza – 20 jyl bas bostandyǵynan aıyrý nemese ómiriniń sońyna deıin bas bostandyǵynan aıyrýdy kózdeıdi. Eshqandaı jeńildik joq, tek joǵary merzimge. Budan basqa, sot hımııalyq kastratsııa túrinde májbúrli sharany qoldanýǵa quqyly, keshegi qylmys boıynsha bul áreket – eń ádil jáne durys bolar edi!», - dep atap ótti Serik Berkamalov.

Onyń aıtýynsha, toptyń ózi jazalaýǵa kirisýi – jaýapkershilik sharasy emes, bul halyqtyń quldyraý formasy, biz tarıhqa qarasaq taspen atqylap óltirý, qandy kek alý jáne osyǵan uqsas varvarlyq «ádil sot» jaqtaýshysy bolǵan emespiz. Qandaı qylmys jasalsa da, ol bı sotymen tarazyǵa salynyp qaralatyn, biz de osy danalyqqa negizdelgen dástúrdi saqtaýymyz kerek.

Serik Berkamalovtyń atap ótýinshe, bulaı kete berse biz basqalardyń sotsyz jazalaýǵa kirisýine jol ashamyz. Sol kezde qylmys ornynda kezdeısoq ustalyp, ashýly toptyń qolyna túsip jazyqsyz jazalanyp ketseńiz, tańǵalmańyz. Ondaıda ádil sottan úmit kútpeńiz.

«Qylmysker qatań ári ádil jazasyn alatynyna daý joq. Mundaı qylmystarǵa ólim jazasyn taǵaıyndaýdy qaıtarýǵa da bolady. Alaıda jazany kúsheıtý máseleni tolyq sheshpeıdi. Balalarymyzdyń densaýlyǵy men ómirine qol suqpaýshylyqty qaıtaryp bermeıdi. Bul jerde memlekettiń basty mindeti – mundaı faktilerdi túp-tamyrymen joıý, zorlyqtyń aldyn alý jáne ony boldyrmaý júıesin qurý. Bul – tereńirek oılanatyn jaıt», - dep túıindedi sózin Qazaqstan zańgerler odaǵynyń elordadaǵy fılıal tóraǵasy Serik Berkamalov.

Eske sala ketsek, QR Prezıdenti Sátbaev qalasyndaǵy jaǵdaı boıynsha keńes ótkizgen edi.