Prezıdenttiń kúzet qyzmetine tıesili áýe kemeleri memlekettik avıatsııa quramyna ótti

ASTANA. QazAqparat – Premer-Mınıstr Álıhan Smaıylov «Qazaqstan Respýblıkasy Memlekettik kúzet qyzmetiniń keıbir máseleleri týraly» Úkimet qaýlysyna qol qoıdy, dep habarlaıdy QazAqparat tilshisi.

«Qazaqstan Respýblıkasy Memlekettik kúzet qyzmetiniń avıatsııasy Qazaqstan Respýblıkasynyń memlekettik avıatsııasynyń quramyna engizilsin», - delingen Úkimet basshysy qol qoıǵan qujatta.

Osy qaýly qol qoıylǵan kúnnen, ıaǵnı 12 maýsymnan bastap kúshine endi.

Qosa ketsek, buǵan deıin Memlekettik kúzet qyzmetiniń mıssııasy ózgerip, birqatar quzyret beriletinin jazyp edik.

Sonymen qosa, endi Memlekettik kúzet qyzmeti Nursultan Nazarbaevtyń qaýipsizdigin qamtamasyz etpeýi múmkin ekenin de habarladyq.