Prezıdenttiń qorǵanys ónerkásibin arnaıy qordan qarjylandyrý usynysy: Sarapshylar ne deıdi

ASTANA. QazAqparat – Prezıdent aıtqan arnaıy qor áskerı baǵyttaǵy ǵylymı izdenisterdi de qarjylandyrýy kerek. «Áskerı-strategııalyq zertteýler ortalyǵy» aktsıonerlik qoǵamynyń vıtse-prezıdenti Nııaz Belgibekov Memleket basshysynyń Joldaýy týraly osyndaı pikir bildirdi, dep habarlaıdy QazAqparat tilshisi.

«Prezıdent Joldaýynda aıtqan arnaıy qordy qurýǵa talpynys bastalǵaly 3 jyldan asty. Biraq áli kúnge deıin qarjylandyrý kózine baılanysty máseleniń basy ashyq tur. Ol qordyń mańyzy óte zor. Óıtkeni qorǵanys ónerkásibi kesheniniń damýy tikeleı qarajatqa baılanysty. Bul –birinshi jaǵy. Ekinshi jaǵynan, ǵylymı izdenisterdi uıymdastyrý da mańyzdy. Arnaıy qor qurylsa, ǵylymı jumystarǵa bólek aqsha bólingen durys dep esepteımin.

Memleket basshysy da qorǵanys ónerkásibin damytýdyń basym baǵyttarynyń biri – ǵylymı ázirlemelerdi ilgeriletý ekenin aıtty. Ǵylymı ázirlemelerdiń esebinen qosymsha quny joǵary tehnologııalardyń aıasy keńeıedi. Munyń bári bir-birinen ajyratýǵa kelmeıtin, ózara baılanysty dúnıeler. Naqty aıtsaq, qorǵanys baǵytyndaǵy ǵylymı zertteýler men tájirıbelik-konstrýktorlyq jumystar arnaıy qor esebinen qarjylandyrylýy kerek», - deıdi sarapshy.

Sondaı-aq ol álemde bolyp jatqan geosaıası jaǵdaılardan qorytyndy shyǵaryp, ony qoldanysqa engizý mańyzdy ekenin aıtady.

«Sarapshylar arasynda paıym bar, qazir Qazaqstannyń Qarýly kúshteri Ýkraına armııasynyń 2014 jylǵy deńgeıinde turǵanyn aıtyp júr. Bul kóp dúnıeden habar beredi. Shynymen de Ýkraınada sol kezde bolǵan jaǵdaılarmen salystyrýǵa keletin parrallelder bar. Al qazir Ýkraınanyń sol jaǵdaıdan belgili bir sabaq alyp, Qarýly kúshterdiń júıesin ózgertkenin kórip otyrmyz. Olar aýmaqtyq ásker qurdy. Onyń tıimdi bolǵanyn is júzinde kórip otyr. Osyndaı baǵyttaǵy máseleler bizde de qabyldanyp jatyr. Naqtyraq aıtsaq, Ýkraınanyń tájirıbesinen shyǵarylǵan talpynystar bar, biraq óte sylbyr iske asyp jatyr. Bul máselege tolyq kólemde mán berilip jatqan joq. Qarajat ta jetkilikti deńgeıde bólinip jatqan joq», - deıdi Nııaz Belgibekov.

Sondaı-aq ol jergilikti bıýdjettiń kiris arnasyn keńeıtý bastamasy óńirlerdiń qorǵanys áleýetin arttyrady dep otyr.

«Aýmaqtyq áskerdi engizýdegi mańyzdy tájirıbeniń biri jergilikti atqarýshy organdarǵa atalǵan áskerdi óz bıýdjeti esebinen basqarýǵa berý bolyp esepteledi. Olardy qajetti jabdyqpen, qarý-jaraqty saqtaý oryndarymen qamtamasyz etý solarǵa júkteledi. Buǵan deıin korporatıvtik tabys salyǵynyń bir bóligin jergilikti bıýdjetke qaldyrý týraly sheshim qabyldansa, Memleket basshysy búgingi Joldaýynda qosymsha qun salyǵyn da jergilikti bıýdjette qaldyrý kerektigin aıtty. Bul bastama qorǵanys salasynyń áleýetin arttyrýǵa da serpin beredi dep oılaımyn», - dedi ol.

Sarapshy Joldaýdy ázirleý kezinde qoǵam talqysynda júrgen máselelerdiń bári tereńinen zerttelgenin kórýge bolatynyn aıtady.

«Kelesi Joldaýlarda buǵan deıingileriniń oryndalý deńgeıine baǵa berilse, mundaı joǵary deńgeıdegi bastamalardyń oryndalý kórsetkishi joǵary bolar edi», - deıdi Nııaz Belgibekov.

Aıta keteıik, Parlament palatalarynyń birlesken otyrysynda Memleket basshysy qorǵanys ónerkásibin arnaıy qor arqyly qarjylandyrý qajettigin aıtty.