Prezıdenttiń kadrlyq rezervine kimder qabyldanbaıdy

NUR-SULTAN. QazAqparat - Memlekettik qyzmet isteri agenttiginiń keńeıtilgen otyrysynda agenttik tóraǵasy Anar Jaıylǵanova elimizde Prezıdenttik kadrlyq rezervti qalyptastyrý týraly aıtty. Bul jóninde agenttiktiń baspasóz qyzmetine silteme jasap QazAqparat habarlaıdy.

Prezıdent Qasym-Jomart Toqaev óziniń «Igilik barshaǵa! Sabaqtastyq. Ádildik. Órleý» saılaýaldy baǵdarlamasynda sheshim qabyldaýǵa jáne túrli jaǵdaılar men trendterge tez beıimdelýge qabiletti «jańa formatsııa» basshylarynyń basqarýshy quramyn jańartý qajettigin jarııalady. 15 shildede Úkimettiń keńeıtilgen otyrysynda Memleket basshysy memlekettik organdardyń tıimdilik kórsetkishteri kóbinese qoǵam pikirimen úılespeı jatatynyn atap ótti.

Anar Jaıylǵanovanyń aıtýynsha, Prezıdenttik kadrlyq rezerv keleshegi kemel jastar úshin áleýmettik jedel saty bolyp, jańa formatsııa basshylarynyń derekkózine aınalýy tıis. Sondyqtan, jobanyń aýqymyn eskere otyryp, irikteýdiń ár kezeńinde obektıvtilik, sapa jáne ashyqtyq úrdisi qamtamasyz etilýi qajet.

Rezervke kiretin tulǵalar saıası jáne joǵary ákimshilik basqarýshy, sondaı-aq ulttyq holdıngter men kompanııalardyń basshylyq laýazymdaryna taǵaıyndalady.

Іrikteý mehanızmi klıentke baǵdarlaný turǵysynan pysyqtalǵan. Іrikteýge joǵary bilimi bar jas qazaqstandyqtar, sonymen qatar, sheteldegi otandastar da qatysa alady. Degenmen, oǵan Prezıdent taǵaıyndaıtyn saıası memlekettik qyzmetshiler qatysa almaıdy.

Rezervke qabyldanǵannan keıin olardy Prezıdent janyndaǵy Memlekettik basqarý akademııasy men Nazarbaev Ýnıversıteti bazasynda oqytý josparlanyp otyr.