Prezıdenttiń kadr rezervi: Ózi týraly jalǵan aqparat bergen úmitker irikteýden shyǵarylady
«Jarlyqqa sáıkes, Kadrlyq rezerv úmitkerlerine tekserý júrgizemiz. Biz olardyń adaldyǵyn, qujattaryn jan-jaqty qaraımyz. Eger úmitker ózi týraly jalǵan aqparat berse, ony kez kelgen kezeńde irikteýden shyǵara alamyz. Eger úmitkerler týraly naqty málimetińiz bolsa, bizge jiberýge bolady. Biz máseleniń mán-jaıyn anyqtaımyz jáne qajet bolǵan jaǵdaıda irikteýden shyǵaramyz. Biz ádildik pen ashyqtyqty qoldaımyz», - dedi QR Basqarý akademııasynyń rektory, Prezıdenttik kadr rezervine irikteý komıssııasynyń múshesi Erlan Ábil Úkimet úıindegi baspasóz máslıhatynda.
Onyń aıtýynsha, irikteýdiń kelesi kezeńine ótken qatysýshylardyń ortasha jasy - 30 jáne odan joǵary. Olardyń arasynda shet elderde, Qazaqstannyń úzdik JOO-larynda bilim alǵandar bar.
«Іrikteýdiń kelesi kezeńine ótken 48 úmitker AQSh, Ulybrıtanııa, Qytaı, Sıngapýr sekildi shet elderde bilim alǵan. Al 198 úmitker - Qazaqstanda da, shet elde de oqyǵan. Tek qana Qazaqstanda bilim alǵandar sany - 286, onyń 138-i elimizdiń úzdik JOO-laryn támamdaǵan. 19 úmitker Reseı Federatsııasynda bilim alǵan. Sondyqtan, olardy daıyndyqsyz boldy, kezdeısoq joǵary upaı jınady dep aıtýǵa bolmaıdy», - dedi Erlan Ábil.
Aıta keteıik, «Prezıdenttiń Jastar kadr rezervine» irikteýdiń «Áleýetti baǵalaý» kezeńine 549 qatysýshy ótti. Bul kezeń esse jazý, jobany tanystyrý jáne quzyretti baǵalaý syndy 3 bólikten turady.
«Áleýetti baǵalaý» kezeńinen keıin sarapshylarmen suhbat ótedi. Oǵan aldyńǵy kezeńderde úzdik nátıje kórsetken qatysýshylar jiberiledi. Odan keıin Prezıdent Ákimshiligi quratyn komıssııa irikteýdiń aldyńǵy kezeńderinen tabysty ótken árbir úmitkermen jeke áńgimelesedi. Sonyń qorytyndysy boıynsha Ulttyq komıssııa eń joǵary ball jınaǵan kandıdattardy Prezıdenttik jastar rezervine qabyldaý týraly sheshim qabyldaıdy.
Іrikteýdiń keıingi kezeńderine jiberiletin kandıdattardyń shekti sany belgilengen. Atap aıtqanda, testileý verıfıkatsııasyna 1000 adam ǵana jiberiledi. Kelesi kezeń - áleýetti baǵalaýǵa - 600 adam, saraptamalyq komıssııada suhbattasýǵa - 400 adam, sońǵy Ulttyq komıssııa otyrysynda - 330 adamnyń nátıjesi qaralady.
