Prezıdenttiń kadr rezervi: «Áleýetti baǵalaý» kezeńine 549 úmitker ótti
Bul týraly QR Memlekettik qyzmet isteri agenttiginiń tóraıymy Anar Jaıylǵanova aıtyp berdi.
«Ashyqtyq úshin irikteýge qatysýshylar týraly aqparat barshaǵa qoljetimdi. Іrikteýdiń ár kezeńinen keıin kelesi kezeńge ótkenderdiń tizimin jarııalaımyz. «Áleýetti baǵalaý» kezeńi 2019 jyldyń 22 qazany - 3 qarashasy aralyǵynda ótedi. Bul kezeń 3 bólikten turady: esse jazý, jobany tanystyrý jáne quzyretti baǵalaý. Esse jazý men jobalardy tanystyrý da pkrezerv.kz avtomattandyrylǵan júıesinde onlaın júrgiziledi», - dedi agenttik basshysy Úkimet úıinde ótken baspasóz qyzmetinde.
«Áleýetti baǵalaý» kezeńinen keıin sarapshylarmen suhbat ótedi. Oǵan aldyńǵy kezeńderde úzdik nátıje kórsetken qatysýshylar jiberiledi. Odan keıin Prezıdent Ákimshiligi quratyn komıssııa irikteýdiń aldyńǵy kezeńderinen tabysty ótken ár úmitkermen jeke áńgimelesedi. Sonyń qorytyndysy boıynsha Ulttyq komıssııa eń joǵary ball jınaǵan kandıdattardy Prezıdenttik jastar rezervine qabyldaý týraly sheshim qabyldaıdy.
Atap ótken jón, irikteýdiń keıingi kezeńderine jiberiletin kandıdattardyń shekti sany belgilengen. Atap aıtqanda, testileý verıfıkatsııasyna 1000 adam ǵana jiberiledi. Kelesi kezeń - áleýetti baǵalaýǵa - 600 adam, saraptamalyq komıssııada suhbattasýǵa - 400 adam, sońǵy Ulttyq komıssııa otyrysynda - 330 adamnyń nátıjesi qaralady.
