Prezıdenttiń Germanııaǵa saparynda $2,4 mlrd quraıtyn 30 qujatqa qol qoıyldy
BERLIN. QazAqparat – Qazaqstan Prezıdentiniń Germanııaǵa sapary barysynda jalpy quny 2,4 mlrd dollardy quraıtyn otyz ekonomıkalyq qujatqa qol qoıyldy, dep habarlaıdy QazAqparattyń menshikti tilshisi.
Bul týraly beısenbi keshke jýrnalısterge Kazakh Invest ulttyq kompanııasynyń basqarma tóraǵasy Baýyrjan Sartbaev qol qoıý rásimnen keıin aıtyp berdi.
«Memleket basshysynyń Germanııaǵa resmı sapary aıasynda jalpy quny 2,4 mlrd dollar otyz ekonomıkalyq qujatqa qol qoıyldy. Onyń ishinde qaıta óńdeý jáne mashına jasaý sekildi salalar bar», - dedi B.Sartbaev.
«Olardyń basym bóligi ózara baılanysty jáne joǵary qosymsha quny bar ónim óndiredi», - dep atap ótti Kazakh Invest ulttyq kompanııasynyń basqarma tóraǵasy.
«Sondaı-aq búgin qol qoıylǵan basty qujattardyń biri – Kazakh Invest pen German ekonomıkasynyń shyǵys komıteti arasynda ınvestıtsııa salasyndaǵy yntymaqtastyqty nyǵaıtý jónindegi birlesken jospar. Ol salalardyń basym baǵytyn jáne naqty yntymaqtastyq jobalaryn anyqtaıdy», - dep toqtaldy ol.
Aıta keterligi, German ekonomıkasynyń shyǵys komıteti GFR-dyń Ortalyq, Shyǵys, Ońtústik shyǵys Eýropa, Ońtústik Kavkaz jáne Ortalyq Azııadaǵy 29 memlekettegi ekonomıkalyq múddesine jaýapty.
Avtory Tımýr Dúısekeev
