Prezıdenttiń bul Jarlyǵy halyqty yntalandyrady - astanalyq ana
NUR-SULTAN. QazAqparat - Kópbalaly ana retinde ataýly áleýmettik kómek alatyn elordalyq Aıjan Baıǵozıeva QR Prezıdenti Qasym-Jomart Toqaev qol qoıǵan el azamattarynyń qaryz júktemesin azaıtý týraly Jarlyqqa qatysty óz oıyn aıtty, dep habarlaıdy QazAqparat tilshisi.
«Moıyndaý kerek, eshkim qaryzǵa jetiskennen kirmeıdi. Nesıe de sol sııaqty. Barar baspanań, isher tamaǵyń bolsa, nesıe alýyń ekitalaı. Al búgingi Qaýlynyń shyǵýy óte durys qadam dep oılaımyn. Prezıdent óte durys istegen. Mundaı jańashyldyqqa biz óte qýanyshtymyz», - deıdi astanalyq ana.
Aıjan Baıǵozıeva otaǵasymen birge 4 bala tárbıelep otyr. Sol úshin ataýly áleýmettik kómek te alady. Moıyndarynda tólenip bitpegen nesıeleri bar.
«Óz januıamyzǵa keler bolsaq, kúıeýimniń atynda nesıe bar. Úıde balamen otyrǵandyqtan, maǵan jumyssyz retinde bermeı qoıǵan. Tórt balamyzǵa ataýly áleýmettik kómek alamyz. Qazir memleket barlyq qazaqstandyqtardy áleýmettik turǵyda qoldaý úshin túrli sharalar qabyldap jatyr. Muny yntalandyrý dep aıtýǵa bolady. Memleket kómektesedi eken dep, eńbekti umytyp, qol qýsyrýǵa da bolmaıdy», - deıdi ol.
Aıta ketsek, búgin QR Prezıdenti Qasym-Jomart Toqaev «Qazaqstan Respýblıkasy azamattarynyń qaryz júktemesin azaıtý týraly» Jarlyqqa qol qoıǵan bolatyn.
