Prezıdenttiń «Bes áleýmettik bastamasy» úlken berekeniń bastaýy - Saýytbek Abdrahmanov

ASTANA. QazAqparat - «Bes áleýmettik bastama» aıasyndaǵy 2018-2019 oqý jylyndaǵy qosymsha granttar adam kapıtaly salasyna eleýli serpin beredi. Bul týraly QR Parlamenti palatalarynyń birlesken otyrysynan keıin Májilis depýtaty Saýytbek Abdrahmanov málim etti, dep habarlaıdy QazAqparat.

«Bizdiń Ata Zańymyzda birinshi bapta Qazaqstan Respýblıkasy ózin demokratııalyq, zaıyrly, quqyqtyq jáne áleýmettik memleket retinde ornyqtyrady degen sózder bar. Elbasymyzdyń búgingi sózi sol qaǵıdanyń tamasha dáleli. Prezıdent «Bes áleýmettik bastamany» jarııa etti, onyń árqaısysy bizdiń halqymyz úshin úlken berekeniń bastaýy. Turǵyn úıge qoljetimdilik degen óte tamasha sheshim. Osy oraıda «7-20-25» baǵdarlamasy ıpotekalyq nesıeniń jyldyq mólsherin 7 paıyzdan asyrmaıtyn talapty eskerip otyr», - dep toqtaldy S. Abdrahmanov.

Sonymen qatar ol 2018-2019 oqý jylynda stýdentterge arnalǵan qosymsha granttyń ózi adam kapıtaly salasyna eleýli serpin beretinin atap ótti. «Bilim alýǵa qoljetimdiliktti arttyrý baǵytynda el úshin jaqsy jańalyq jarııa etildi. Qazirgi 54 myń granttyń ústine 20 myń grant qosylǵaly otyr», - dedi depýtat.

Onyń paıymynsha,  «Bes áleýmettik bastamany» júzege asyrý elimiz úshin jaqsy jobalardy iske asyrýǵa múmkindik beredi.

«Elbasy osynyń barlyǵyna berekeli birligimiz bolsa, berekeli tirligimiz bolatynyn atap aıtty. Aldaǵy eleýli jumystarǵa oraı tıisti zańnamaǵa qatysty normatıvtik aktiler boıynsha túzetýler jasalady dep oılaımyz», - dedi Saýytbek Abdrahmanov.