Prezıdenttiń bastamalaryn keıbireýler qysqa merzimdi naýqanǵa aınaldyrdy - Toqaev
«Álemdik sarapshylardyń baǵalaýy boıynsha Qazaqstanda jalpyulttyq jáne jahandyq mindetterdi júzege asyrýǵa qabiletti, shyǵarmashylyq oılaý áleýeti joǵary, aldyna bıik maqsattar qoıa biletin jastar az emes. Bizdiń, parlamentshilerdiń aldynda turǵan mindet - osyndaı daryndy jastarǵa qajetti quqyqtyq jaǵdaı jasaý. Jastar jylynyń mán-mańyzy da osynda. Kezinde Prezıdent Jalpyǵa ortaq Eńbek qoǵamyn qurý jóninde tapsyrma bergen bolatyn. Mazmuny óte salmaqty mańyzdy bastamany tıisti memlekettik qurylymdar uranshyldyqqa salyp, qysqa merzimdi naýqanǵa aınaldyryp jibergenin moıyndaý qajet. Shyn máninde, biz jalpyǵa ortaq eńbek qoǵamy ıdeıasyn alǵa tarta otyryp, barsha halyqtyń, sonyń ishinde jastardyń ulttyq oı-sanasy men minez-qulqyn túbegeıli qaıta qaraý máselesine nazar aýdarýymyz qajet», - dep toqtaldy Qasym-Jomart Toqaev Jastar jylyn ótkizý aıasynda turǵan maqsattarǵa arnalǵan dóńgelek ústel otyrysynda.
Onyń atap ótýinshe, jańa ǵasyrda bizdiń aldymyzda tereń oıly, eńbekqor, syndarly, tózimdi, utqyr jáne jańashyldyqqa umtylǵan ulttyń jańa beınesin, demek, básekege qabiletti ult ıesin qalyptastyrý mindeti tur. Joǵary oqý oryndaryndaǵy baǵdarlamalardyń mazmuny jastardy dál osy zamanaýı qasıetterge baýlýy tıis. Osy oraıda, otandyq joǵary bilim berý júıesiniń kóshin bastap turǵan - Nazarbaev Ýnıversıteti elimizdegi bilim ordalaryna baǵdar bere alatynyn eskerý qajet.
«Elbasy usynǵan «Rýhanı jańǵyrý» baǵdarlamasy, eń aldymen, jastardyń maqsat-múddesin kózdeıtin biregeı joba. Bul qoǵamdy jahandyq órkenıettiń teńdessiz jetistikterimen tanystyratyn, jańa qundylyqtarǵa, atap aıtqanda, syndarly kózqaras pen eńbekke degen súıispenshilikke tárbıeleıtin keń aýqymdy baǵdarlama. Alaıda, biz halqymyzdyń rýhanı murasyna adal bolyp, ótkenniń sabaqtaryn umytpaýymyz qajet. Prezıdenttiń «Uly dalanyń jeti qyry» maqalasy da - jastardy ulttyq qundylyqtarǵa baýlıtyn óte keremet týyndy. Memleket basshysynyń maqalasy jas urpaqty ata-babalarymyz mura etken jetistiktermen tanystyratyn qundy dúnıe», - dedi Senat spıkeri.
