Prezıdenttiń bastamalary aýyl sharýashylyǵyna tyń serpin beredi - sarapshy

NUR-SULTAN. QazAqparat – Prezıdenttiń aýyl sharýashylyq jerlerin tıimdi ıgerý baǵytynda kótergen bastamalary salany damytýǵa tyń serpin beredi. Bul týraly QR Prezıdentiniń janyndaǵy QSZI áleýmettik saıası zertteýler bóliminiń bas sarapshysy Janar Túlendınova málim etti, dep habarlaıdy QazAqparat tilshisi.

«Ulttyq qoǵamdyq senim keńes otyrysynda Prezıdenttiń agrarlyq salada usynǵan sharalaryna toqtalǵym keledi. Agrarlyq saladaǵy eń basty máseleniń biri – ol búginde ıgerilmeı jatqan egis alqaptaryn aýyl sharýashylyǵy aınalymyna engizý. Birinshiden, Memleket basshysy paıdalanylmaı jatqan jer telimderin anyqtaý maqsatynda jerdiń ǵaryshtyq monıtorıngin qamtıtyn zańǵa qol qoıylǵanyn atap ótti. Ekinshiden, ıgerilmegen egis alqaptary úshin salyq salý tártibi kúsheıtilmek», - dedi J. Túlendınova.

Osy oraıda sarapshy usynylǵan bul normanyń arqasynda «latıfýndısterge» jerdi aýyl sharýashylyǵy aınalymyna shyǵarmaı, bosqa ustap turýyna tıimdi bolmaıtynyn jetkizdi.

«Memleket basshysy shilde aıyndaǵy Úkimettiń keńeıtilgen otyrysynda atap ótkendeı, aýyl sharýashylyǵy jerlerin osy salada naqty jumys isteıtinder ıgerýi tıis. Munymen qosa, ıgerilmeı jatqan jerlerdi májbúrlep qaıtaryp alýdyń ýaqytyn eki jyldan bir jylǵa deıin qysqartý qadamy kóterildi. Bul sharalar bos turǵan egistik jerleriniń aýdanyn azaıtýǵa múmkindik jasap, agrarlyq sektordy damytýǵa tyń serpin beredi degen oıdamyn. Osy turǵyda tek ósimdik sharýashylyǵy ǵana emes, sonymen qatar mal sharýashylyǵy salasyna da jaǵdaı jasalmaq. Óıtkeni sońǵy kezderi jaıylym jerleri men jem-shóp daqyldary kólemin arttyrý máselesi jıi kóterilip júr», - dedi Janar Túlendınova.

Budan buryn habarlanǵandaı, Ulttyq qoǵamdyq senim keńes otyrysynda Prezıdent Qasym-Jomart Toqaev ıgerilmeı jatqan jer ýchaskelerine salynatyn bazalyq salyqty 10-nan 20 esege deıin arttyrýdy usyndy.

Sonymen qatar Memleket basshysy aýyl sharýashylyǵy jerlerin ǵaryshtan baqylaý boıynsha tapsyrmalar berdi.