Prezıdenttiń baǵasy bizdiń shabytymyzǵa qanat bitirdi - Ahmet Baıtursynuly músininiń avtory

ASTANA.QazAqparat – Memleket basshysy Qasym-Jomart Toqaev búgin Almaty qalasyna sapary aıasynda ult ustazy Ahmet Baıtursynulyna arnalǵan eskertkishtiń ashylý saltanatyna qatysty. Іs-shara barysynda Prezıdent eskertkish avtorlarynyń jumysyn joǵary baǵalaǵan eken. Osy rette QazAqparat tilshisi músindi jasaǵan avtorlardyń biri Aıdos Sábıtulyna habarlasyp, az-kem áńgimege tartqan edi.

Aıta keteıik, Memleket basshysy saltanatty rásimnen keıin aqynnyń urpaqtarymen, zııaly qaýym ókilderimen, sondaı-aq eskertkish avtorlary Aıdos Búrkitbaevpen jáne Tımýr Ermuhametovpen áńgimelesip, sýretke tústi.

«Eskertkishtiń ashylý rásiminen keıin, Prezıdent bizdi arnaıy qasyna shaqyryp, qolymyzdy alyp, rızashylyǵyn bildirdi. Bizdiń qaıda oqyǵanymyzdy, buǵan deıin qandaı jumystar jasaǵanymyzdy surady. Tımýr ekeýmiz múmkindiginshe buǵan deıin jasaǵan jumystarymyz týraly qysqasha aıttyq. Memleket basshysy bizden «Jeke sheberhanalaryń bar ma?» dep surady. Biz bar ekendigin aıttyq. «Bul jumys maǵan qatty unady, árbir detaldaryna muqııat kóńil bólip jasaǵan ekensińder. Qanshama jumystardy kórip júrmin, keıbir músinder kóńilime tolmaıtyny da ras. Al sizderge kóp rahmet, jumystaryń tabysty bolsyn!» dedi. Bul baǵa bizdiń shabytymyzǵa qanat bitirgendeı boldy. Buıyrsa aldaǵy ýaqytta budan da jaqsy jumystar jasaýǵa tyrsamyz», - deıdi músinniń avtory Aıdos Sábıtuly.

Sonymen birge, eskertkish avtory sátti shyqqan týyndynyń ereksheligimen bólisti. Onyń aıtýynsha, tulǵalarǵa arnalǵan eskertkish sol tulǵanyń kelbetimen qosa, ishki jan-dúnıesin de ashýy tıis ekendigin, úlken izdenis kerektigin aıtady.

«Músin qoladan quıylǵan, tuǵyry granıt tastan jasalǵan. Bıiktigi - 3,5 metr, tuǵyry - 1,5 metr, jalpy bıiktigi 5 metr bolady. Ahmet atamyzdy bilmeıtin kisi joq shyǵar, ult ustazynyń beınesin jasaýda ol kisiniń muraǵattardaǵy sýretterin qaradyq, jas kezindegi, qartaıǵan kezindegi beınelerin izdedik. Ómir joly týraly qaıtalap oqydyq», - deıdi Aıdos Sábıtuly.

10 jyldan beri osy salada jumys istep kele jatqan azamattar buǵan deıin de kóptegen tulǵalardyń eskertkishin jasaýǵa atsalysypty. Bári de jurttyń kóńilinen shyqqan týyndylar.

«Buǵan deıin Almatyda asharshylyq qurbandaryna qoıylǵan eskertkishtiń beınesin jasadyq. Astana qalasyna qoıylǵan Ábý Nasyr ál-Farabı, Almatyda Nurtas Ońdasynov, Shámshi Qaldaıaqovtyń eskertkishterin jasadyq. Jaqynda Taraz qalasynda qoıylǵan Sherhan Murtaza atamyzdyń eskertkishi de bizdiń týyndy. Tulǵalarǵa arnalǵan týyndynyń sátti shyǵýy, onyń syrtqy kelbeti ǵana emes ishki jan-dúnıesine úńilgendigimizden bolar. Biz ózimiz kirisip, jasaıtyn tulǵanyń ómirimen tolyq tanysamyz, oqyp zertteımiz, sýretterin, beıne materıaldaryn aqtaramyz, sol arqyly eskertkishke minezin, jan-dúnıesin sińirýge tyrsamyz», - deıdi Aıdos Sábıtuly.

Esterińizge sala keteıik, qazaqtyń rýhanı kósemi atanǵan Alash ardaqtysy, Ult ustazy Ahmet Baıtursynulynyń týǵanyna bıyl 150 jyl tolyp otyr.

Basty foto: akorda.kz