Prezıdenttiń aıtqan syny ádil boldy – sógis alǵan mınıstrler pikir bildirdi

NUR-SULTAN. QazAqparat – QR Premer-Mınıstriniń orynbasary – Saýda jáne ıntegratsııa mınıstri Baqyt Sultanov pen Aýyl sharýashylyǵy mınıstri Erbol Qarashókeev Memleket basshysynyń ózderine sógis jarııalaýy oryndy bolǵanyn aıtty, dep habarlaıdy QazAqparat tilshisi.

«Buǵan deıin de Prezıdenttiń máseleni óte ádil kótergenin aıtqanmyn. Aıtylǵan syn óte durys. Qazir sol turǵyda jumys istep jatyrmyz. Qyzmetimizdiń tıimdiligin arttyrý jóninde mindet qoıyldy. Aýyl sharýashylyǵy mınıstrligimen birge sharalardy pysyqtadyq. Onyń nátıejesin sizderge de, Memleket basshysyna da baıandap otyramyz», - dedi Baqyt Sultanov ortalyq kommýnıkatsııalar qyzmetinde ótip jatqan brıfıngte BAQ ókilderiniń saýalyna bergen jaýabynda.

Erbol Qarashókeev te Prezıdenttiń synynan sabaq alyp jatqanyn aıtty.

«Memleket basshysynyń aıtqan syny ádil boldy. Jumysymyzda olqylyqtar bolǵanyn bilemiz. Baıandamamda qant naryǵyndaǵy dúrbeleńge obektıvti de, sýbektıvti de faktorlar áser etkenin aıttym. Qazir ahýaldy túzetip, jumysymyzdyń tıimdiligin arttyrý úshin qoldan kelgenniń bárin jasap jatyrmyz», - dedi mınıstr.

Buǵan deıin Úkimettiń keńeıtilgen otyrysynda Memleket basshysy Qasym-Jomart Toqaev qant tapshylyǵyn retteı almaǵan Saýda jáne ıntegratsııa mınıstri Baqyt Sultanov pen Aýyl sharýashylyǵy mınıstri Erbol Qarashókeevke sógis jarııalaǵan edi.

Foto: ortcom.kz