Prezıdenttiń aınalasynda júrgen adamdar sóılemese, kim sóıleıdi bul tilde?! - depýtat O.Asanǵazy
«Kúltegin babamyz aıtady: «Kún uıyqtamadym, tún uıyqtamadym, kedeıdi baı qylsam dep», kún uıyqtamańyzdar, tún uıyqtamańyzdar, qazaqtyń kósem, sheshen, beıneli kórkem tilin ózderińiz bılikte sóıletińizder! Qujat jóninde, basqa jóninde qıyn bolatynyn bilemin. Biraq daýǵa aınaldyrmaı, beldi býyp, qazaq tilin meńgerińizder», - dedi depýtat búgin QR Prezıdenti Іs basqarmasynyń birqatar memlekettik kásiporyndary jınalǵan otyrysta.
Onyń aıtýynsha, Elbasynyń tapsyrmasymen 2006 jyldan bastap, 2010 jylǵa sheıin barlyq bıliktiń salasy memlekettik tilge kóshti. «Biraq sizderge de, maǵan da jasyryn emes, bárimiz oryssha jazamyz, tórt-bes aýdarmashylar aýdaryp qoıady, sosyn biz memlekettik tilge ótemiz deımiz. Jınalystyń barlyǵy orys tilinde ótedi. Al endi bizdiń Konstıtýtsııamyzda, Til týraly zańymyzda Qazaqstan elinde memlekettik til - qazaq tili dep jazylǵan», - dep qynjylady ol. «Álemde 9 myń ult bar bolǵan bolsa, qazir onyń tek 2 myńy ǵana qaldy. Eger osy tilde sóıleıtin sońǵy adam qaıtys bolsa, ult óldi deıdi. Dál osyndaı jaǵdaıǵa baryp qalǵan kezimizde, táýelsizdik keldi. Qazir, Qudaıǵa shúkir, qazaq tili ǵylymnyń da, tehnıkanyń da tili boldy. Biraq memlekettik basqarýǵa áli jetken joq. Sondyqtan jandaryńyzdy sál-sál qınańyzdar», - dep úndedi O.Asanǵazy.
Depýtattyń sózinshe, jumystarynda qazaqsha sóıleıtin adamdarǵa jol ashý kerek, qazaq tili bıliktiń tili bolýy shart.
«Sizdiń mekeme, sizderdiń bastaýysh uıymdaryńyzda kez kelgen jaza alatyn adam óziniń ana tilinde jazsyn, jınalysta óziniń ana tilinde sóılesin. Halyqtyń kútip otyrǵany osy. Mysaly, Mánshúk pen Álııa 18 jastarynda «Men Otanymdy qorǵaımyn» dep qarý ustap, soǵysqa bardy. Tóbesinen bomba jarylyp, baratyn jeri syz boldy. Qazir bizderge jyly kabınetterde otyryp, óz ana tilimizde sóıleý qıyn emes qoı. Sizderden kútiletini osy. Eger sizder sóılemeseńizder, Prezıdenttiń aınalasynda júrgen adamdar sóılemese, kim sóıleıdi bul tilde. Men bilemin - qıyn, oryssha ońaı, biraq biz qazaq tiline aýystyrýymyz kerek», - dep qadap aıtty til janashyry.
