Prezıdenttiń Astanadaǵy alǵashqy kabıneti qandaı bolǵan
Dál osy jerde memlekettik mańyzy bar sheshimder qabyldandy. Jáne munda Prezıdenttiń burynǵy kabıneti qaz-qalpynda saqtalǵan. Astana kúni qarsańynda QazAqparat tilshisi el úshin, jer úshin, qazaq úshin mańyzy zor osy bir murajaıdy taǵy bir márte aralap shyqty. Ekskýrsııalyq qyzmettiń jetekshisi Ásel Shotkınanyń kómegimen biz 20 jylǵa keıin sheginip, sol kezdegi atmosferany sezinip qaıttyq.
Prezıdent otyrǵan burynǵy kabınettiń qabyldaý bóliminde xatshynyń telefondary áli tur. "Osy telefondar arqyly xatshy xabarlasqan adamdardy Prezıdentke qosyp otyrǵan. Sol sebepti oǵan birneshe shet tilin bilý mindeti qoıyldy", - deıdi Ásel Shotkına.
Búginde qabyldaý bóliminde Prezıdenttiń ómirbaıanyna arnalǵan fotosýretter ilinip tur. Alaıda kabınettiń ózi esh ózgerissiz qaldy. Atmosferasy da sol qalpy sııaqty. Bul jerde Elbasy 1997-2004 jyldary eńbek etti, san alýan jınalystar men shaǵyn quramdaǵy kezdesýlerdi ótkizdi. Ústeldiń ústinde jatqan qujattar men bloknottar da sol kezden qalǵan tarıxı jádigerler. Tipti, qalamsaptar da jatyr. Memleket basshysy onymen kezinde jarlyqtar, qaýlylar men taǵaıyndaýlarǵa qol qoıǵan.
"Birneshe telefonnyń arasynda úlken bir apparatty baıqaýǵa bolady. Onyń bastyrmasy kóp. Árbireýinde laýazymdy tulǵanyń aty jazylǵan. Dál osy apparat arqyly Prezıdent sol adamdarmen baılanysyp otyrdy. Olardyń ishinde Mınıstrler kabıneti men Prezıdent Ákimshiliginiń ókilderi bar", - dep atap kórsetti Shotkına.
Kabınettiń sáýletinde qazaqtyń ulttyq naqyshtary aıqyn baıqalady. Máselen, tóbede oıý-órnekter bar. Al jıhazdyń bári arnaıy tapsyryspen jasalǵan. Prezıdenttiń burynǵy kabınetinde Tájikstan delegatsııasy alyp kelgen vaza da tur. Bul jerde Qazaqstannyń qazba baılyqtaryna arnalǵan elektrondy karta men aqkıiz ilinip tur. 2015 jylǵy ulyqtaý rásimi kezinde Nursultan Nazarbaev dál osy aqkıizdiń ústine turyp, el aldynda ant bergen.
Kabınetten keıingi zal "alaýoshaq zaly", ıa bolmasa "kamın zaly" dep atalady. Ol jerde uzaq ári aýyr kelissózderden keıin erkin áńgimeler aıtyldy. Zaldyń sáýleti de klassıkalyq stılde jasaldy. Ony jasaqtaý barysynda aǵashtyń túr-túri, mármár men granıt tastary qoldanyldy.
Prezıdenttiń burynǵy rezıdentsııasynda "qysqy baq" ta saqtaldy. Alaıda ol shaǵyn ári janǵa jaıly kabınet úlgisinde bolǵan. "Biz ony "relaks zonasy" dep ataımyz. Bul jerde shaǵyn quramdaǵy kelissózder júrgizildi. Prezıdenttiń qazirgi rezıdentsııasy - Aqordada qysqy baq budan áldeqaıda úlken. Al panoramalyq terezeler arqyly Esildiń oń jaǵalaýy da, sol jaǵalaýy da anyq kórinedi", - deıdi Shotkına.
"Relaks" zonadan bólek beıresmı kezdesýlerge arnalǵan zal da bar. Ol jerde memleket basshylary jeke-dara otyryp, shaxmat oınaǵan. Pil súıeginen jasalǵan shaxmat áli kúnge deıin sol zalda tur. Bul - Reseı delegatsııasynyń syıy. 
Prezıdenttiń burynǵy dombyrasy da osynda. Dál osy kabınette Nursultan Nazarbaev "Úshqońyr" ánin jazǵan.
Burynǵy rezıdentsııada májilis zaly da bar. Onda Memleket basshysy san alýan jınalystar men keńester ótkizdi.
Altyn zalǵa barar jolda elordany Aqmolaǵa kóshirý tarıxymen jan-jaqty tanysýǵa bolady. "Altyn zal" dep ataýdyń ózindik sebebi de joq emes. Onyń túsi altyn sııaqty sap-sary. Sol sebepti joǵary deńgeıdegi kezdesýlerge arnalǵan bolatyn. Budan bólek, memlekettik rámizderdi Aqmolaǵa alyp kelgen kezdegi fotosýretter de bar. Al "kúmis zalda" resmı sharalar uıymdastyryldy. Qujattarǵa qol qoıyldy, memlekettik nagradalar tapsyryldy.
Aıta ketken jón, burynǵy rezıdentsııada Prezıdenttiń shaǵyn kabıneti de bolǵan. Onda da jumys ústeli, telefondar men kitaptarǵa arnalǵan shkaf bar. Dál sol kabınette Memleket basshysy selektorlyq keńesterdi ótkizdi. 2004 jyldan bergi televızor da tur. Nursultan Nazarbaev ol arqyly el jańalyqtaryn kórip otyrǵan.
Al sońǵy zalda Prezıdent janyndaǵy Qaýipsizdik keńesiniń otyrystary ótken. Qazir ony "Qarý-jaraq zaly" dep ataıdy. Sebebi ol jerge Nursultan Nazarbaevtyń qarý-jaraq kollektsııasy tolyǵymen qoıylǵan.
