Prezıdenttiń áleýmettik bastamalaryn uzaqqa sozǵan sheneýnikter jazasyz qalmaıdy - Máýlen Áshimbaev
Bul týraly «Nur Otan» partııasy Tóraǵasynyń Birinshi orynbasary Máýlen Áshimbaev málim etti.
«Qandaı da bir protsesti qadaǵalaý úshin aqparat alý, aqparatty jınaý óte mańyzdy. Sondyqtan, bes áleýmettik bastamanyń júzege asyrylýyn qadaǵalaý aıasynda bekitilgen tártip boıynsha eń aldymen memlekettik organdardan aqparat alyp otyramyz. Ekinshiden, Qoǵamdyq keńes janynan qurylatyn nemese jemisti eńbek etip jatqan sarapshylyq toptardan aqparat jınaımyz. Úshinshiden, aqparat jınaýǵa úkimettik emes uıymdar men kásipodaqtardy, óńirlerdegi Demokratııalyq kúshter koalıtsııasyn tartýdy josparlap otyrmyz», - dedi Máýlen Áshimbaev Prezıdenttiń bes áleýmettik bastamasynyń júzege asyrylýyn qadaǵalaıtyn Qoǵamdyq keńes otyrysynda.
Sonymen birge, Máýlen Áshimbaev el turǵyndaryn da Prezıdenttiń áleýmettik bastamalyn iske asyrý týraly belsendi aqparat berýge shaqyrdy.
«Azamattar bizdegi («Nur Otan» partııasyndaǵy - red.) qabyldaý bólimderi arqyly habar bere alady. Bizdiń veb-portalda bes bastamaǵa arnaıy aıdar ashylǵan. Sondaǵy jedel jeli arqyly habarlasýǵa da bolady. Aqparat jınaý maqsatynda jaqynda arnaıy mobıldi qosymsha shyǵady. Osylaısha, kemishilikter men kedergilerdi der kezinde anyqtap, qajetti usynymdar ázirleı alamyz», - dep óz sózin tolyqtyrdy birinshi hatshy.
Onyń aıtýynsha, «Nur Otan» partııasy Prezıdenttiń áleýmettik bastamalaryn júzege asyrýdy uzaqqa sozyp, merziminen keshiktirgen sheneýnikterdi anyqtaıdy jáne qadaǵalaý keńesterinde olardyń jaýapkershiligi máselesin qarastyrady.
«Nur Otan» partııasy Prezıdenttiń bastamalaryn júzege asyrýdy keshiktirip, uzaqqa sozǵan sheneýnikterdi anyqtaıdy jáne onyń jaýapkershiligi máselesin alǵa qoıady. Kóshbasshymyzdyń bastamalaryn iske asyrýdy keshiktirýge, sozbaqtaýǵa jol bermeımiz. Sondyqtan, bul iske shyndap kirisip otyrmyz», - dedi M. Áshimbaev.
Qoǵamdyq keńes aıasynda 5 áleýmettik bastama boıynsha 5 top qurýdy, «Nur Otan» partııasynyń ortalyq jáne óńirlerdegi resýrstaryn barynsha paıdalanýdy jáne qadaǵalaýdyń tehnologııalyq múmkindikterin jasaýdy usyndy.
Aıta keteıik, Nur Otan partııasy Prezıdenttiń bes áleýmettik bastamasynyń júzege asyrylýyn qadaǵalaıtyn Qoǵamdyq keńes qurdy. Keńes quramynda eldegi jetekshi saıası partııalardyń basshylary, úkimettik emes uıymdar men Qazaqstan halqy Assambleıasynyń ókilderi, belgili qoǵam qaıratkerleri jáne sarapshy mamandar bar.
Qoǵamdyq keńestiń tóraǵasy qyzmetine QR Parlamenti Senatynyń depýtaty Baqytjan Jumaǵulov, hatshy qyzmetine - Nur Otan partııasynyń hatshysy Farhat Qýanǵanov taǵaıyndaldy.
