Prezıdenttiń 5 sheteldik JOO fılıalyn ashý tapsyrmasy qalaı oryndalyp jatyr

NUR-SULTAN. QazAqparat – QR Ǵylym jáne joǵary bilim mınıstrligi Prezıdent Qasym-Jomart Toqaevtyń elimizde úzdik sheteldik JOO-lardyń fılıaldaryn ashý týraly tapsyrmasy qalaı oryndalyp jatqanyn aıtty, dep habarlaıdy QazAqparat.

​«2025 jylǵa qaraı elimizde bedeldi sheteldik ýnıversıtetterdiń keminde 5 fılıalyn ashý qajet dep sanaımyn. Bul rette tehnıkalyq baǵyttaǵy joǵary oqý ornynyń eki fılıalyn elimizdiń batysynda ashý kerek», - degen edi Memleket basshysy Parlament Májilisiniń plenarlyq otyrysynda.

Mınıstrlik málimetinshe, búginge deıin sheteldik 3 JOO-nyń fılıaldary ashyldy, olar - «Máskeý ınjenerlik-fızıka ınstıtýty» Ulttyq ıadrolyq zertteý ýnıversıteti (Reseı); M.Gýbkın atyndaǵy Reseı munaı jáne gaz ýnıversıteti; Arızona Ýnıversıteti (AQSh).

Atap aıtqanda,

Almatydaǵy Ál-Farabı atyndaǵy QazUÝ bazasynda «MIFI» Ulttyq ıadrolyq zertteý ýnıversıtetiniń (RF) fılıaly ashyldy. Bıyl 100 grant bólindi, sondaı-aq aqyly oqýǵa túsýge múmkindik bar. Oqytý 1 qazanda bastalady. Stýdentter «Elementar bólshekter fızıkasy jáne kosmofızıka» (bakalavrıat), «Qorǵalǵan joǵary ónimdi esepteý júıeleri» (bakalavrıat, magıstratýra) baǵdarlamalary boıynsha oqıtyn bolady.

Atyraý qalasynda S.Ótebaev atyndaǵy Atyraý munaı jáne gaz ýnıversıtetiniń bazasynda M.Gýbkın atyndaǵy Reseı munaı jáne gaz ýnıversıtetiniń fılıaly ashyldy. Bıyl 200 grant bólindi. Stýdentter «Munaı-gaz qubyrlary men munaı-gaz qoımalaryn salý jáne paıdalaný», «Munaı-gaz tehnologııalary», «Munaı men gazdyń tabıǵı rezervýarlaryn geologııalyq modeldeý» daıyndyq baǵdarlamalary boıynsha oqıdy.

Kozybayev University bazasynda Arızona Ýnıversıtetiniń (AQSh) qos dıplomdy bilim berý baǵdarlamasy iske qosyldy. Bıylǵy jyly ýnıversıtetke elimizdiń túkpir-túkpirinen 170 úmitker oqýǵa tústi, onyń 45-i qos dıplom baǵdarlamasy boıynsha. Stýdentter IT, ınjenerııa, agrotehnologııa jáne bilim berý baǵyttary boıynsha qazaq, orys, aǵylshyn tilderinde oqıdy.