Prezıdenttiń 2 mlrd aǵash otyrǵyzý tapsyrmasy qalaı oryndalyp jatyr

NUR-SULTAN. QazAqparat – QR Ekologııa, geologııa jáne tabıǵı resýrstar mınıstri Serikqalı Brekeshev Prezıdenttiń 2 mlrd aǵash otyrǵyzý tapsyrmasynyń qalaı oryndalyp jatqanyn aıtyp berdi, dep habarlaıdy QazAqparat tilshisi.

«Orman qorynda 2 mıllıardtan astam aǵash otyrǵyzý jumystary jalǵasýda. 5 jylǵa arnalǵan keshendi josparlar bekitildi. Ormandy tolyqtyrýdy baqylaý men monıtorıngileýge arnalǵan ınteraktıvti karta jasaldy. Atap aıtqanda, búgingi tańda josparlanǵan 129 mln aǵashtyń 89 mıllıony otyrǵyzyldy», - dedi S. Brekeshev Úkimet otyrysynda.

Odan basqa, Memleket basshysynyń tapsyrmasymen Aral teńiziniń qurǵaǵan túbine jalpy kólemi 1,1 mln gektar jerge sekseýil otyrǵyzý bastaldy.

«Bıyl sekseýil egý 100 myń ga alqapta, kelesi 4 jylda jyl saıyn 250 myń ga alqapta júrgiziletin bolady. Ózbekstan Respýblıkasynyń oń tájirıbesin qoldana otyryp, biz alǵash ret sekseýildi aero egýdi júrgizýdi josparlap otyrǵanymyzdy atap ótý qajet. Yntymaqtastyq jónindegi tıisti jol kartasyna qol qoıyldy», - dep atap ótti mınıstr.

Eske sala ketsek, Prezıdent Q. Toqaev 2020 jylǵy Qazaqstan halqyna Joldaýynda 5 jylda 2 mlrd túp aǵash otyrǵyzý týraly tapsyrma bergen bolatyn.