Prezıdenttikten úmittker Mels Eleýsizov memlekettik tilden emtıhannan ótti
ASTANA. 18 aqpan. QazAqparat /Aıdar Ospanalıev/ - «Tabıǵat» ekologııalyq odaǵynyń tóraǵasy Mels Eleýsizov Prezıdenttikke kandıdattardyń memlekettik tildi erkin meńgergendigin anyqtaý jónindegi lıngvıstıkalyq komıssııasyna emtıhandy óte jaqsy tapsyrdy».
Búgin lıngvıstıkalyq komıssııanyń jumysyn qorytyndylaǵan atalmysh komıssııa tóraǵasy Myrzataı Joldasbekov osylaı dedi.
M.Joldasbekovtyń sózine qaraǵanda, M.Eleýsizov úsh kezeńnen turatyn emtıhannyń birinshi kezeńinde «Qazaqstannyń bolashaǵy» taqyrybyna shyǵarma jazdy. «Ol shyǵarmany jaqsy jazdy. Jazba jumysy eki bet emes, úsh bet bolyp shyqty. Shyǵarmada 7 qate bar. Onyń 2-ýi orfografııalyq, 4-ýi tynys belgisinen jiberilgen qate, 1 stıldik qate bar. M.Eleýsizov taqyrypty jaqsy ashty, oıy da ornyqty. Emtıhannyń ekinshi kezeńinde Muqaǵalı Maqataevtyń óleńderin túsinip, uǵynyp, mánerlep óte jaqsy oqydy. Sondyqtan biz ekinshi syndy da jaqsy dep baǵaladyq. Al úshinshi synda «Jer taǵdyry - el taǵdyry» degen taqyryp keldi. Bul M.Eleýsizovtyń ómir boıy aınalysyp kele jatqan máselesi. Sondyqtan ol bul taqyryp boıynsha bizge jaqsy áńgime aıtyp berdi. Osylaısha lıngvıstıkalyq komıssııa músheleri M.Eleýsizov qazaq tilin erkin meńgergen degen qorytyndy shyǵardy», - dedi M.Joldasbekov.
Sondaı-aq komıssııa tóraǵasy «M.Eleýsizov elimizdiń belgili azamaty, ol qaıratker. Halyq úshin týǵan adam dep oılaımyz. Bul bizdiń komıssııa músheleriniń pikiri. Osyndaı azamattyń emtıhandy jaqsy tapsyrǵanyna biz de qýanamyz jáne sáttilik tileımiz», - dedi M,Joldasbekov.
