Prezıdenttikten úmitker kúzetshi qazaq tilinen emtıhan tapsyra almady

Búgin Prezıdenttikke kandıdattardyń memlekettik tildi erkin meńgergendigin anyqtaý jónindegi lıngvıstıkalyq komıssııa ókilderi osyndaı sheshim shyǵardy.

Prezıdenttikke úmitkerdiń emtıhan jumysynyń nátıjelerin jarııa etken lıngvıstıkalyq komıssııanyń tóraǵasy Myrzataı Joldasbekovtyń aıtýynsha, 3 túrli kezeń boıynsha alynǵan emtıhannyń birinshi kezeńinde úmitker «Perzent paryzy» degen taqyrypqa shyǵarma jazdy. Onyń shyǵarmasy óte saýatsyz. Orfografııalyq 24 qate, tynys belgilerinen 23 qate, stıldik 5 qate jiberdi. Barlyǵy - 52 qate. Ekinshi kezeńde Ǵabıt Músirepovtyń shyǵarmalarynan úzindi oqydy. T.Baımýrzın mátindi kibirtiktep, sozbalap ázer oqydy. Al úshinshi kezeńdegi «Batyrlyq pen súıispenshilik» taqyryby múldem ashylmady. Bul Prezıdent bolam degen adamǵa kósilip sóıleıtin-aq taqyryp edi. Al úmitker tipti sóılem quraı almady. Osynyń barlyǵyn eskere kelgende T.Baımýrzın qazaq tilin meńgermegen degen baılamǵa keldik»,-dedi M.Joldasbekov.

Sondaı-aq komıssııa tóraǵasy, Prezıdent saılaýy eldiń, memlekettiń taǵdyryn sheshetin asa iri saıası naýqan ekendigin aıta kele: «Biz Táýelsizdik alǵan jyldardan beri talaı oqıǵalardy bastan ótkerdik, biraq mundaı sumdyqty men birinshi ret kórip otyrmyn. Keıingi kezde osy Prezıdenttik saılaýdy keıbir azamattar erikkeniń ermegine aınaldyryp jibergen sııaqty», - dedi.

Esterińizge sala keteıik, bul osymen kezekten tys Prezıdenttik saılaýǵa qatysamyn dep Ortalyq saılaý komıssııasyna ótinish berip, alaıda qazaq tilinen emtıhan tapsyra almaı otyrǵan úshinshi azamat. Osyǵan deıin memlekettik tilden emtıhandy "Kenesary han" qoǵamdyq qorynyń prezıdenti Ýálıhan Qaısarov pen Astana qalasynyń turǵyny, ýaqytsha jumyssyz Qanat Esjanov tapsyra almaı, saılaýdan tys qalǵan bolatyn.