Prezıdenttikten úmitker Gúldana Toqbaeva qol jınaýǵa kirisetin boldy
ASTANA. 20 aqpan. QazAqparat /Aıdar Ospanalıev/ - Ortalyq saılaý komıssııasy búgin kezekten Prezıdenttikten úmitker Gúldana Toqbaevanyń kandıdatýrasy Konstıtýtsııa men «QR Saılaý týraly» zańdardyń talaptaryna sáıkes dep taýyp, qaýly qabyldady.
Bul týraly búgin Ortalyq saılaý komıssııasynyń kezekti otyrysynda málim boldy.
Esterińizge sala keteıik, keshe G.Toqbaeva Prezıdenttikke kandıdattardyń memlekettik tildi erkin meńgergendigin anyqtaý jónindegi lıngvıstıkalyq komıssııaǵa emtıhandy sátti tapsyrǵan bolatyn. Endi OSK úmitkerge qol jınaý úshin qol qoıý paraqtaryn berip, ol búginnen bastap daýys jınaýǵa kirisedi. Gúldana Toqbaeva Jambyl oblysynyń týmasy, jasy 57-de. Esh jerde jumys istemeıdi.
Sondaı-aq Ortalyq saılaý komıssııasy Prezıdenttikke úmitkerlerdiń memlekettik tildi erkin meńgergendigin anyqtaý jónindegi lıngvıstıkalyq komıssııaǵa emtıhan tapsyra almaý sebepti úmitker Maıa Qaramaevany kezekten tys Prezıdent saılaýyna kandıdat etip tirkeýden bas tartyp, qaýly qabyldady.
Ótkizilgen emtıhan nátıjeleri boıynsha lıngvıstıkalyq komıssııa ashyq daýys berý arqyly biraýyzdan Qazaqstan Respýblıkasy Prezıdenttigine kandıdat Maıa Tólegenqyzy Qaramaeva memlekettik tildi erkin meńgermegen degen sheshim qabyldady.
Qazaqstan Respýblıkasy Prezıdenttigine kandıdattyń memlekettik tildi erkin meńgergendigin anyqtaý jónindegi lıngvıstıkalyq komıssııanyń tóraǵasy M.Joldasbekov komıssııanyń sheshimin jarııalaı kele, «úmitker úsh kezeńnen turatyn emtıhannyń birinshi kezeńinde «El muraty - er muraty» degen taqyrypta shyǵarma jazdy. Shyǵarmada qateler kóp. Emle qateleri - 14, tynys belgisinen ketken qate -21, stıldik qate - 6. Sonymen barlyǵy 41 qate boldy. Emtıhannyń ekinshi kezeńinde Júsipbek Aımaýytovtyń shyǵarmalarynan úzindi oqydy. Úmitkerdiń mátin oqýy da nashar bolyp shyqty. Ol mátindi qınalyp, ejiktep oqydy. Úshinshi kezeńde «Qaryz ben paryz» taqyrybynda 15 mınýttyń ornyna 5 mınýt sóıledi. Oıy shashyrańqy, taqyrypty túsindire almady. Sózdik qory az. Qoryta kelgende lıngvıstıkalyq komıssııa músheleri Maıa Qaramaeva memlekettik tildi erkin meńgermegen degen sheshim shyǵardy»,- dep atap ótti.
Lıngvıstıkalyq komıssııanyń otyrysyna Qazaqstan Respýblıkasy Ortalyq saılaý komıssııasynyń múshesi L.J.Súleımen qatysty.
