Prezıdenttikten úmitker Adalbek Qunanbaev memlekettik tilden emtıhan tapsyra almady
ASTANA. 20 aqpan. QazAqparat /Aıdar Ospanalıev/ - Prezıdenttikten úmitker Adalbek Qunanbaev Prezıdenttikke úmitkerlerdiń memlekettik tildi erkin meńgergendigin anyqtaý jónindegi lıngvıstıkalyq komıssııaǵa emtıhan tapsyra almady.
Búgin lıngvıstıkalyq komıssııasynyń otyrysyn qorytyndylaǵan atalmysh komıssııa tóraǵasy Myrzataı Joldasbekovtyń aıtýynsha, úmitker A.Qunanbaev emtıhan talaptaryna saı birinshi «Ustaz ulaǵaty» degen taqyrypqa shyǵarma jazdy. Shyǵarmasynda qateler óte kóp. «Onyń ústine jazba jumysynyń kólemi bir jarym-aq bet boldy. Ekinshi talap boıynsha ol Maǵjan Jumabaevtyń óleńderin oqydy. Úmitkerdiń mátin oqý, óleń oqý jaǵynan da tájirıbesi az bolyp shyqty. Sondaı-aq úshinshi talap boıynsha úmitker «Ónerli órge júzedi» degen taqyrypta 15 mınýttyń ornyna 5 mınýt qana sóıledi. Munda da birshama kemshilikter oryn aldy. Taqyryp ashylmady. Osylardyń barlyǵyn eskere kele, biz A.Qunanbaev memlekettik tildi erkin meńgermegen degen qorytyndyǵa keldik»,- M.Joldasbekov.
Esterińizge sala keteıik, bul osymen 3 sáýirge belgilengen kezekten tys Prezıdent saılaýyna qatysý úshin ótinish berip, alaıda memlekettik tilden emtıhan tapsyra almaı qalǵan 5-shi úmitker.
