Prezıdenttikten kandıdat Amantaı qajy Asylbek lıngvıstıkalyq komıssııanyń otyrysyna taǵy da kelmedi
ASTANA. 16 aqpan. QazAqparat /Aıdar Ospanalıev/ - «Attan, Qazaqstan» qozǵalysynyń jetekshisi Amantaı qajy Asylbek Prezıdenttikke kandıdattardyń memlekettik tildi erkin meńgergendigin anyqtaý jónindegi lıngvıstıkalyq komıssııanyń otyrysyna ekinshi márte kelmeı qaldy.
Búgin saǵat 11-00-ge josparlanǵan otyrysqa jınalǵan lıngvıstıkalyq komıssııa músheleri Prezıdenttikke úmitker Amantaı qajy Asylbekten taǵy da emtıhan ala almaı tarasty.
Lıngvıstıkalyq komıssııa tóraǵasy Myrzataı Joldasbekovtyń pikirinshe, úmitker endi óziniń emtıhanǵa kelmeı qalǵandyǵyn túsindiretin qujat tapsyrýy kerek. «Jalpy, bul meniń jeke pikirim. Prezıdent bolam degen adamnyń jalpyǵa birdeı tártipke, komıssııa múshelerine, zańǵa degen qurmeti bolýy kerek. Qalaı degenmen de bul Ortalyq saılaý komıssııasy. Jalpy, qajy degen bizdiń uǵymymyzda halyq syılaıtyn qasıetti azamat. Al biz bolsaq komıssııa otyrysy ótedi dep ekinshi ret kelip otyrmyz. Zań bar, tártip bar. Onyń bárin qoıǵanda adamgershilik degen bar emes pe? Eger ol shyn máninde Allanyń jolynda júrgen adam bolsa, adamdy, zańdy syılaýy kerek edi. Men búgin bul úmitkerdiń áreketine tań qalyp otyrmyn»,-dedi lıngvıstıkalyq komıssııa tóraǵasy.
Esterińizge sala keteıik, búgin Ortalyq saılaý komıssııasynyń otyrysynda atalmysh komıssııa tóraǵasy Qýandyq Turǵanqulov Prezıdenttikke úmitker «Attan, Qazaqstan» qozǵalysynyń jetekshisi Amantaı qajy Asylbekti Prezıdenttikke úmitkerlerdi usyný merzimi aıaqtalǵan kúnge deıin kútetindigin málimdegen bolatyn. «Amantaı qajy Asylbek Prezıdentikke kandıdattardyń memlekettik tildi erkin meńgergendigin anyqtaý jónindegi komıssııaǵa áli kúnge deıin kelgen joq. Biraq tıisti zańǵa saı biz ony Prezıdentikke úmitkerlerdi usyný merzimi aıaqtalǵanǵa deıin kútýimiz kerek», - dedi komıssııa tóraǵasy.
