Prezıdenttikke usynylǵan Nurjan Áltaevtyń qujattary burmalaný faktisine tekserilip jatyr

ASTANA. QazAqparat – Qazaqstan Respýblıkasynyń prezıdenttigine kandıdat retinde taǵy bir úmitker – Nurjan Áltaevtyń qujattary tapsyryldy. Alaıda, úmitkerdi usyný týraly hattama burmalaný faktisine tekserilip jatyr. Bul týraly Ortalyq saılaý komıssııasy málim etti, dep habarlaıdy QazAqparat.

«2022 jylǵy 7 qazanda Qazaqstan Respýblıkasynyń Ortalyq saılaý komıssııasyna «Qazaqstan Respýblıkasyndaǵy saılaý týraly» Qazaqstan Respýblıkasy Konstıtýtsııalyq Zańynyń 54 jáne 55-baptaryna, sondaı-aq «Qazaqstan Respýblıkasy Prezıdentiniń 2022 jylǵy 20 qarashaǵa taǵaıyndalǵan kezekten tys saılaýy boıynsha saılaý qujattarynyń nysandaryn belgileý týraly» Qazaqstan Respýblıkasy Ortalyq saılaý komıssııasynyń 2022 jylǵy 23 qyrkúıektegi № 67/545 qaýlysyna sáıkes Nurjan Baýyrjanuly Áltaevtyń «Muqalmas» Respýblıkalyq qoǵamdyq birlestiginen Qazaqstan Respýblıkasynyń Prezıdenttigine kandıdat bolyp usynylǵany týraly kelesi qujattary usynyldy:

1. «Muqalmas» respýblıkalyq qoǵamdyq birlestiginiń joǵary organy otyrysynyń Qazaqstan Respýblıkasynyń Prezıdenttigine usyný týraly hattamasynan úzindikóshirmesi;

2. N.B. Áltaevtyń Qazaqstan Respýblıkasynyń Prezıdenttigine kandıdat bolýǵa kelisimi týraly ómirbaıandyq derekteri qosa berilgen ótinishi;

3. Qazaqstan Respýblıkasy Ortalyq saılaý komıssııasynyń shotyna saılaý jarnasynyń engizilgenin kýálandyratyn qujat;

4. Jeke basyn kýálandyratyn qujattyń kóshirmesi;

5. Joǵary bilimi týraly dıplomnyń kóshirmesi.

Sondaı-aq, Ortsaılaýkomǵa a.j. 7 qazanda «Muqalmas» RQB fılıaldarynyń birqatar basshylarynan «Muqalmas» respýblıkalyq qoǵamdyq birlestiginiń joǵary organy otyrysynyń Qazaqstan Respýblıkasynyń Prezıdenttigine N.B. Áltaevty usyný týraly hattamasynyń burmalanǵany týraly ótinish kelip túskenin habarlaımyz.

Qazirgi ýaqytta osy fakt boıynsha quzyretti organdar tekserý júrgizýde», - delingen QR Ortalyq saılaý komıssııasy taratqan aqparattyq habarda.