Prezıdenttikke úmitkerlerdiń memlekettik tilden emtıhan tapsyrýǵa esh sebepsiz kelmeı qalýy aıtarlyqtaı shyǵyn keltirdi - OSK tóraǵasy
ANA. 24 aqpan. QazAqparat /Aıdar Ospanalıev/ - Ortalyq saılaý komıssııasy Prezıdenttikke úmitker Murat Telibekovty Prezıdenttike kandıdat etip tirkeýden bas tartyp, qaýly qabyldady.
OSK hatshysy Baqyt Meldeshovtyń aıtýynsha, mundaı qaýlynyń qabyldanýyna negiz bolyp otyrǵan - Qazaqstan Respýblıkasynyń Prezıdenttigine úmitker M.Telibekovtiń Prezıdenttikke kandıdattardyń memlekettik tildi erkin meńgergendigin anyqtaý jónindegi komıssııanyń otyrysyna kelmeı qalýy. «Osy sebepti onyń Konstıtýtsııa men «QR Saılaý týraly» konstıtýtsııalyq zańynyń memlekettik tildi erkin meńgerý bóligindegi talaptaryna sáıkestigi anyqtalǵan joq. Biz lıngvıstıkalyq komıssııanyń otyrysy ótetindigi jóninde eskertý úshin birneshe márte telefon soqtyq. Úmitker emtıhan tapsyrýy kerek kúni onyń telefony istemeı turdy. Al aqparat quraldary arqyly emtıhanǵa kelmeı qalǵandyǵy jarııa etilgennen keıin onyń telefony birden iske qosyldy», - dedi OSK hatshysy.
Sondaı-aq OSK tóraǵasy Qýandyq Turǵanqulovtyń aıtýynsha, úmitkerlerdiń emtıhandy tapsyrýdan osyndaı jolmen bas tartýlary memleketke aıtarlyqtaı shyǵyn keltirip otyr. «Bul -Ortalyq saılaý komıssııasyndaǵy qatardaǵy qyzmetkerden bastap komıssııa jumysyna jumsalatyn shyǵyndar, bul - lıngvıstıkalyq komıssııanyń shyǵyndary, bul - úmitkermen baılanysqa shyǵý maqsatyndaǵy shyǵyndar, bul - is-qaǵazdarǵa jumsalatyn shyǵyndar. Menińshe bundaı áreketti tártipsizdik deýden basqa amal joq», -dedi ol.
Ortalyq saılaý komıssııasy búgingi otyrys barysynda sondaı-aq Prezıdenttikke úmitker Birjan Dilmaǵambetti de kandıdat retinde tirkeýden bas tartyp, qaýly qabyldady. Keshe atalmysh azamat Prezıdenttikke kandıdattardyń memlekettik tildi erkin meńgergendigin anyqtaý jónindegi lıngvıstıkalyq komıssııanyń otyrysyna kelip turyp, memlekettik tilden emtıhan tapsyrýdan bas tartqan bolatyn.
