Prezıdenttikke úmitkerlerdiń arasynda ShYU, EQYU, BUU sııaqty halyqaralyq ınstıtýttardy bilmeıtinderi de bar - lıngvıstıkalyq komıssııa ókili
ANA. 24 aqpan. QazAqparat /Aıdar Ospanalıev/ - 3 sáýirge belgilengen kezekten tys Prezıdent saılaýyna úmitkerlerdiń arasynda Shanhaı yntymaqtastyq uıymy,
Eýropadaǵy qaýipsizdik jáne yntymaqtastyq uıymy, Birikken Ulttar Uıymy sııaqty halyqaralyq uıymdardyń bar ekeninen de beıhabar azamattar boldy. Bul týraly búgin Prezıdenttikke kandıdattardyń memlekettik tildi erkin meńgergendigin anyqtaý jónindegi lıngvıstıkalyq komıssııa múshesi Sherýbaı Qurmanbaıuly málim etti.
Onyń sózine qaraǵanda, lıngvıstıkalyq komıssııaǵa alǵash emtıhan tapsyrǵan azamattar ózderiniń bilimderin tekseretin saýaldardan góri olardyń qazaq tilin qanshalyqty meńgergendigin anyqtaıtyn suraqtar qoıýdy surady. «Qazaqstannyń halyqaralyq baılanystary, Halyqaralyq qatynas aıasyndaǵy Qazaqstan sııaqty taqyryptarǵa kóptegen kandıdattar jaýap bere almady. Sondyqtan biz komıssııa otyrystarynyń barysynda úmitkerlerdiń bilim deńgeıin nemese erýdıtsııasyn emes, olardyń tildi bilý deńgeıin baǵalaıtyn tapsyrmalar berdik. Ekinshi másele til, ádebıet degende úmitkerlerdiń qazaq tilindegi shyǵarmalardy qanshalyqty saýatty oqıtyndyqtary saralandy. Jalpy alǵanda tapsyrmalardyń barlyǵy úmitkerlerdiń memlekettik tildi qanshalyqty saýatty meńgergendigin anyqtaýǵa baǵyttaldy. Sondyqtan úmitkerlerge berilgen tapsyrmalardyń barlyǵy durys dep esepteımin»,- dedi lıngvıstıkalyq komıssııa múshesi.
Onyń sózine qaraǵanda, úmitkerler tarapynan aıtylǵan usynys-pikirlerdiń ońdylaryn aldaǵy ýaqytta eskerýge bolady.
