Prezıdenttikke úmitkerler medıtsınalyq anyqtama usynýy kerek - M.Joldasbekov
«Emtıhannan keıin QR Prezıdenti Nursultan Nazarbaevty búgingi «Nur Otan» seziniń aıaqtalýymen, sol sezde biraýyzdan aldaǵy saılaýǵa úmitker retinde usynylýymen quttyqtadyq. 2011 jyly da osy lıngvıstıkalyq komıssııany basqarǵan edim. Búgin emtıhannan keıin Prezıdent Nursultan Ábishulymen birqatar máseleler boıynsha áńgimelesip, aqyldastyq», - dedi M.Joldasbekov BAQ ókilderine bergen brıfıng barysynda.
Onyń aıtýynsha, qazir Prezıdenttikke úmitkerler medıtsınalyq anyqtama tapsyrmaıtyny alańdatýshylyq týdyrady.
«Máselen, qarap otyrsaq, Prezıdenttikke úmitkerler medıtsınalyq anyqtama tapsyrmaıdy. Biraq bul kezinde bolǵan ereje eken. Keıin biraz halyqaralyq baqylaýshylar «adam quqyǵyn buzý» degen soń, bul bap alynyp qalypty. Biraq meniń oıymsha, prezıdentikke úmitkerler medıtsınalyq anyqtama tapsyrýy kerek. Nege? Sebebi qazir mektepke barǵan baladan da, qyzmetke ornalasqysy keletin adamnan da medıtsınalyq kitapsha mindetti túrde talap etiledi. El basqaratyn adam úshin Alladan aldymen suraıtynymyz - osy densaýlyq. Sondyqtan prezıdentikke úmitker adam medıtsınalyq anyqtama tapsyrýy kerek degen usynys aıttym»,- dedi M.Joldasbekov.
Sonymen qatar M.Joldasbekovtiń aıtýynsha, áńgimelesý barysynda prezıdenttikke úmitkerlerdiń bilimi de sóz bolǵan.
«Ekinshi bir másele, Konstıtýtsııamyzda prezıdenttikke úmitker azamattyń bilimi týraly aıtylmaǵan. Baıaǵy zaman emes, bilim salasy damyǵan memleketpiz. Sondyqtan múmkin bolsa, kelesi ýaqyttarda Qazaqstan Respýblıkasy prezıdenttigine úmitker adamnyń bilimi mindetti túrde joǵary bolýy kerek degen talap bolsa degen oıymyzdy jetkizdik», - dedi M.Joldasbekov.
