Prezıdenttikke úmitker Ý.Qaısarov: TMD Táýelsiz Memleketter Dostastyǵynyń qazaqshasy ma sonda?
ASTANA. QazAqparat - Búgin QR Ortalyq saılaý komıssııasynda Qazaqstan Respýblıkasynyń prezıdenttigine úmitker Ýálıhan Qaısarov qazaqtyń kóptegen baıyrǵy sózderin túsine almady.
Lıngvıstıkalyq komıssııa óz sheshimin shyǵarǵannan keıin Ý.Qaısarovqa suraq qoıý múmkindigi berildi. «Sizder TMD dep aıtyp otyrsyzdar. Biraq, TMD degen sóz suraqta bolǵan da joq, aıtylǵan da joq. Sol TMD-ny qaıdan aldyńyz», - dedi úmitker Ý.Qaısarov komıssııa tóraǵasy Myrzataı Joldasbekovke.
«Men ony oılap tapqanym joq. Bul burynǵy Keńes odaǵynyń quramynda bolǵan memleketterdiń 1991 jylǵy jeltoqsanda Almatyda qurǵan dostastyǵy. Sodan keıin bizdiń Táýelsizdigimiz bastaldy. Sizge berilgen taqyryp «Táýelsiz Memleketter Dostastyǵy: tarıhy men búgini», - dedi M.Joldasbekov.
«Iá», - dedi Ý.Qaısarov. - Biraq TMD qaı jerde? TMD Táýelsiz Memleketter Dostastyǵynyń qazaqshasy ma sonda?».
«Táýelsiz Memleketter Dostastyǵy degenimiz, osy sózderdiń bas áripterin alsańyz TMD bolady», - dedi taǵy bir márte túsindirgen komıssııa tóraǵasy.
Kandıdat sonda da komıssııa múshesiniń mundaı dáıekterge kelispeıtindigin aıtty. «Ol túsinikti ǵoı. Biraq Táýelsiz Memleketter Dostastyǵy degenimiz - Qazaqstannyń basqa táýelsiz memlekettermen dostastyǵy. Mysaly, Reseı de, Ózbekstan da, Qyrǵyzstan da táýelsiz ǵoı», - dedi kandıdat.
«Siz taqyrypty túsinbegensiz, áńgime basqada. Siz Qazaqstannyń dos memleketteri dep Qytaıdy, Amerıkany atadyńyz, durys. Shúkir, Qazaqstan barlyq memlekettermen jaý emes, dos. Biraq, myna taqyryp anyq, al ol ashylmaǵan, siz ol jaıynda jazbaǵansyz», - dedi M.Joldasbekov.
