Prezıdenttikke úmitker Sádibek Túgel daýys berdi

NUR-SULTAN. QazAqparat - «Uly Dala qyrandary» respýblıkalyq qoǵamdyq qozǵalysynan QR Prezıdenttigine úmitker Sádibek Túgel elordadaǵy «Daryn» lıtseıinde ornalasqan saılaý ýchaskesine kelip daýys berdi, dep habarlaıdy QazAqparat tilshisi.

«Kóńil tolqyp, júrekti qýanysh kernep tur. Halyqtyń belsendiligin, halyqtyń saılaý ýchaskesine aǵylyp jatqanyn kórip turmyn. Bul degen úlken qýanysh. Bul bizdiń bereke-birligimizdiń artqanyn, eldigimiz ben tutastyǵymyzdy kórsetedi», - dedi Sádibek Túgel.

Eske sala ketsek, búgin Qazaqstan Prezıdentin kezekten tys saılaý bastaldy. QR Prezıdentiniń kezekten tys saılaýynda el ishinde jáne shet elderde 9 968 daýys berý ýchaskesi jumys isteıdi.

Saılaý týraly Konstıtýtsııalyq zańǵa sáıkes, daýys berý ýaqyty standartty (saǵat 7.00-20.00 aralyǵy) bolady.