Prezıdenttikke úmitker S.Saparǵalı memlekettik tildi erkin meńgergen - lıngvıstıkalyq komıssııa
ASTANA. 23 aqpan. QazAqparat /Aıdar Ospanalıev/ - Prezıdenttikke úmitker Serik Saparǵalı memlekettik tildi erkin meńgergen. Búgin atalmysh azamattan emtıhan alǵan Prezıdenttikke kandıdattardyń memlekettik tildi erkin meńgergendigin anyqtaý jónindegi lıngvıstıkalyq komıssııa ókilderi osyndaı sheshim shyǵardy.
Lıngvıstıkalyq komıssııa tóraǵasy Myrzataı Joldasbekovtyń aıtýynsha, S.Saparǵalı 3 kezeńnen turatyn emtıhannyń birinshi kezeńinde «Qyz ósse, eldiń kórki» atty taqyrypta shyǵarma jazdy.
«Ol jazba jumysyn saýatty jazdy. Emleden qate joq, tynys belgilerinen - 2, stıldik 2 qate bar. Barlyǵy 4 qate. Ekinshi kezeń boıynsha ol Júsipbek Aımaýytovtyń shyǵarmalarynan úzindi oqydy. Ony da óziniń yrǵaǵymen, mátinniń mazmuny men maǵynasyn uǵyna otyryp, óte jaqsy oqydy. Al úshinshi kezeńde «Salaýatty ómir salty» taqyrybynda sóıledi. Ony da jaqsy ashyp, óziniń ómirden kórgen-túıgenderi kóp azamat ekenin kórsetti. Osynyń barlyǵyn eskere kelgende lıngvıstıkalyq komıssııa S.Saparǵalı memlekettik tildi erkin meńgergen degen baılamǵa keldi»,-dedi M.Joldasbekov.
Esterińizge sala keteıik, S.Saparǵalı Prezıdentikke kandıdattardyń memlekettik tildi erkin meńgergendigin anyqtaý jónindegi lıngvıstıkalyq komıssııaǵa emtıhan tapsyrǵan sońǵy úmitker.
