Prezıdenttikke úmitker Murat Telibekov memlekettik tilden emtıhan tapsyrýǵa kelmeı qaldy
ASTANA. 23 aqpan. QazAqparat /Aıdar Ospanalıev/ - Prezıdenttikke úmitker Murat Telibekov Prezıdenttikke kandıdattardyń memlekettik tildi erkin meńgergendigin anyqtaý jónindegi lıngvıstıkalyq komıssııanyń otyrysyna kelmeı qaldy.
Bul týraly búgin atalmysh lıngvıstıkalyq komıssııanyń tóraǵasy Myrzataı Joldasbekov málim etti.
«Biz Prezıdenttikke úmitker Murat Telibekovti emtıhanǵa keledi dep 1 saǵat kúttik. Al úmitker ýaqytynda emtıhanǵa kelmedi. Endi biz ol kisiden emtıhandy búgin tústen keıin alýǵa tyrysamyz. Biraq úmitkerdiń tústen keıin de keletinine senimdi emespin. Biz úmitkermen telefon arqyly baılanysýǵa tyrystyq. Alaıda ol telefonyn da kótermeıdi. Men osyǵan tań qalamyn. Shyndyǵyn aıtsam, jeke meniń ózim mundaı adamnan emtıhan alǵym kelmeıdi»,-dedi M.Joldasbekov.
Onyń pikirinshe, zańdy, adam quqyǵyn syılaý árbir azamattyń paryzy. Onyń ústine ýaqytpen de eseptesý kerek. «Men mundaı adamdar Elbasymen taıtalasa alady degenge senbeımin. Men mundaı áreketten bútindeı bir memlekettiń aýyrtpalyǵyn, halyqtyń jaǵdaıyn moınyna alyp otyrǵan azamatty kórip otyrǵan joqpyn»,-dedi lıngvıstıkalyq komıssııa tóraǵasy.
