Prezıdenttikke úmitker M.Eleýsizovtyń qatysýymen Almaty mańyndaǵy bulaq kózi qaıta ashyldy
ALMATY. 1 sáýir. QazAqparat /Názıra Eleýhan/ - Búgin Almatyda «Tabıǵat» ekoodaǵynyń tóraǵasy, QR Prezıdenttigine úmitker M.Eleýsizovtyń qatysýymen Almaty mańyndaǵy bulaq kózi qaıta qalpyna keltirildi.
Esterińizge sala ketsek, jol qurylysy júrgizilýine oraı, qala mańyndaǵy bul bulaqtyń asfalt astynda qalý qaýpi tóngen bolatyn. M.Eleýsizov 24 naýryz kúni osy bulaq kózin ashyp, qaıta qylpyna keltirýge jaýapkershilik alǵan edi.
Tabıǵat janashyry bulaq kózin tazalaý men qaıta qalpyna keltirý jumystaryn uıymdastyryp, osylaısha, Almaty jáne Shyǵys Qazaqstan oblystaryndaǵy osyndaı bulaqtardy qaıta qalpyna keltirýge arnalǵan baǵdarlamasyn bastady.
«Bul bulaq kózine 150 jyldan astam ýaqyt boldy, onyń emdik qasıetteri bar. Sondyqtan biz ony qorǵaýymyz kerek. Keńes zamanynda ókimet shıpaly sýdyń mańynda shıpajaı qurylysyn jobalaǵan bolatyn. Ókinishke oraı, sý quramynda tek bir ǵana qospa jetpegendikten, qurylysty júrgizýge ruqsat berilmedi»,-dedi M.Eleýsizov. Onyń aıtýynsha, bulaq kózi jaqyn mańdaǵy turǵyndardyń osy mańǵa qoqystardy tastaýynan bitelip qalǵan.
