Prezıdenttikke úmitker Qaraqat Ábden OSK-ǵa qujattaryn tapsyrdy
Qaraqat Ábden Ortalyq saılaý komıssııasynyń qujattardy qabyldaý jónindegi komıssııasyna mynadaı qujattardy tapsyrdy:
1. «Kásibı áleýmettik jumyskerler Ulttyq alıansy» respýblıkalyq qoǵamdyq birlestiginiń joǵary organy otyrysynyń kandıdatty usyný týraly hattamalarynan úzindi kóshirmeniń túpnusqasy;
2. Úmitkerdiń Qazaqstan Respýblıkasynyń prezıdenttigine kandıdat bolýǵa kelisimi týraly, ómirbaıandyq derekteri qosa berilgen ótinishi;
3. Qazaqstan Respýblıkasy Ortalyq saılaý komıssııasynyń shotyna saılaý jarnasynyń engizilgenin kýálandyratyn qujat;
4. Jeke basyn kýálandyratyn qujattyń kóshirmesi;
5. Joǵary bilimi týraly dıplomdardyń kóshirmeleri;
6. Memlekettik jáne saılanbaly laýazymdardaǵy jumys tájirıbesi týraly qujattar;
7. Qazaqstan Respýblıkasynyń prezıdenttigine kandıdattyń ómirbaıandyq derekteri.
Qujattardy qabyldaý komıssııasynyń músheleri ár qujatty jeke-jeke qarap shyǵyp, olar boıynsha eshqandaı saýaldary joq ekenin jetkizdi.
Úmitker Qaraqat Ábdenge usynǵan qujattardyń qabyldanǵany týraly akt berildi.
7 qazanda «Kásibı áleýmettik jumyskerler Ulttyq alıansy» respýblıkalyq qoǵamdyq birlestigi kezekten tys prezıdent saılaýyna Qaraqat Jaqsylyqqyzy Ábdenniń kandıdatýrasyn usynǵan bolatyn. Q. Ábden – tanymal qoǵam qaıratkeri, QR Prezıdenti janyndaǵy Áıelder isteri jáne otbasy-demografııalyq saıasat Ulttyq komıssııasynyń múshesi, Astana ákiminiń áleýmettik máseleler jónindegi shtattan tys keńesshisi, elordanyń qoǵamdyq keńesiniń múshesi, máslıhat depýtaty. Tórt bala tárbıelep otyr.
Eske salaıyq, búgin OSK halyq koalıtsııasy usynǵan Qasym-Jomart Toqaevtyń QR prezıdenttigine kandıdatýrasyn barlyq talaptarǵa saı dep sheshti.
Sondaı-aq «Amanat» Qazaqstan kásipodaqtar dostastyǵy» respýblıkalyq birlestigi usynǵan Meıram Qajykenniń kandıdatýrasy talaptarǵa saı degen qorytyndy jasaldy.