Prezıdenttikke úmitker Q. Týrageldıev pen J. Bázilbaev ózderiniń kandıdatýralaryn alyp tastaıtyndyqtaryn málimdedi
ANA. 1 naýryz. QazAqparat /Aıdar Ospanalıev/ - Prezıdenttikke úmitker Qanat Týrageldıev óziniń kandıdatýrasyn alyp tastaý jóninde Ortalyq saılaý komıssııasyna ótinish túsirdi.
Bul týraly búgin úmitker jýrnalısterge bergen suhbatynda málim etti.
Onyń sózine qaraǵanda, Elbasynyń bıylǵy Joldaýynda kórsetilgen máseleler kóńilden shyǵady. Ondaǵy kóp máseleler qazaqtyń jaǵdaıyn ońaltýǵa baǵyttalǵan. «Men elimizge syrttan kelip, jaqsy jetistikke jetken azamattardy bilemin. Olardyń barlyǵy osyndaı jaǵdaıǵa tek aýyzbirliktiń arqasynda ǵana jetip otyr. Sondyqtan biz de, ıaǵnı qazaq halqy úlken jetistikterge jetýimiz kerek. Biz «bir jaǵadan bas, bir jeńnen qol shyǵara» otyryp, tirshilik etýimiz kerek. Men Memleket basshysynyń bıylǵy Joldaýynda kórsetilgen mindetterdi jan-jaqty saralaı kele osyndaı sheshim jasadym. Ortalyq saılaý komıssııasy meniń qujattarymdy qabyldady. Men qazaq tilinen emtıhannan de óttim. Saılaýdyń ádil ótip jatqanyna kóz jetkizdim», - dedi úmitker.
Q.Týrageldıev Prezıdenttikke úmitker retinde QR Ortalyq saılaý komıssııasyna 14 aqpan kúni ótinish berip, 16 aqpan kúni Prezıdenttikke kandıdattardyń memlekettik tildi erkin meńgergendigin anyqtaý jónindegi lıngvıstıkalyq komıssııanyń synynan súrinbeı ótken bolatyn.
Sonymen qatar búgin Prezıdentikke úmitker taǵy bir kandıdat - ózin-ózi usynǵan Jemqorlyqpen kúres qoǵamdyq komıtetiniń tóraǵasy Jaqsybaı Bázilbaev ta kandıdatýrasyn alyp tastaıtynyn, saılaý aldy naýqanynna qatyspaıtynyn aıtty. Ol bundaı sheshim qabyldaǵanyn búgin Astanada ótken baspasóz máslıhatynda jetkizdi.
Aıta keteıik, J. Bázilbaev Prezıdenttikeke úmitker retinde QR Ortalyq saılaý komıssıasyna 18 aqpan kúni ótinish bergen bolatyn. Al 22 aqpanda ol memlekettik tilden emtıhan tapsyryp, Prezıdenttikke kandıdattardyń memlekettik tildi erkin meńgergendigin anyqtaý jónindegi OSK lıngvıstıkalyq komıssııanyń synynan súrinbeı ótti. Sodan keıin oǵan ózin qoldaýshylardyń daýysyn jınaý úshin qol qoıý paraqtary berildi. Al jaqynda Ortalyq saılaý komıssııasy J. Bázilbaev ózin qoldaıtyn saılaýshylardyń daýystaryn jınaýǵa áli kirispegenin habarlaǵan bolatyn.
Esterińizge salaıyq, Qazaqstan Respýblıkasy Prezıdenttigine kandıdattardy tirkeý úmitkerlerdiń joǵary memlekettik laýazymǵa barlyq qajetti qujattardy tapsyrǵannan keıin bastalady jáne 2011 jylǵy 2 naýryzda aıaqtalady.
Aıta keteıik, osy sátke deıin QR Ortalyq saılaý komıssııasy tórt úmitkerdi, atap aıtqanda «Nur Otan» Halyqtyq-demokratııalyq partııasy usynǵan Elbasy Nursultan Nazarbaevty, Qazaqstannyń kommýnıstik halyqtyq partııasynyń hatshysy Jambyl Ahmetbekovty, Qazaqstan Patrıottary partııasynyń tóraǵasy Ǵanı Qasymovty jáne «Tabıǵat» ekologııalyq odaǵynyń tóraǵasy Mels Eleýsizovty. Qazaqstan Respýblıkasynyń Prezıdenttigine kandıdat retinde tirkedi.
