Prezıdenttikke úmitker E.Úkteshbaev memlekettik tildi erkin meńgergendigin dáleldeı almady

ASTANA. QazAqparat - Búgin QR Ortalyq saılaý komıssııasynda Qazaqstan Respýblıkasynyń prezıdenttigine úmitker Esenbek Japaruly Úkteshbaevtyń memlekettik tildi meńgerý deńgeıin anyqtaý jónindegi lıngvıstıkalyq komıssııanyń otyrysy boldy.

Lıngvıstıkalyq komıssııanyń sheshimimen Qazaqstan Respýblıkasynyń prezıdenttigine úmitker Esenbek Japaruly Úkteshbaev memlekettik tildi erkin meńgermegen dep tanyldy.

Lıngvıstıkalyq komıssııanyń tóraǵasy Myrzataı Joldasbekov komıssııanyń sheshimdi ashyq daýys berý arqyly kópshilik daýyspen qabyldaǵanyn jarııalap, emtıhan barysy týraly aıtyp berdi.

«Tańdaǵan taqyrypty ashý talap etiletin jazbasha tapsyrmada úmitker óz oıyn qısynyna keltirip jetkize almady, sóz tirkesteriniń ádebı normalaryn buza otyryp, sóılemderdi stılıstıkalyq jaǵynan durys qurǵan joq. Jazbasha tapsyrmanyń kólemi talap etiletin eki paraqtan kem boldy», - dedi ol.

Komıssııa tóraǵasynyń sózine qaraǵanda, ekinshi synaqta úmitker Muqaǵalı Maqataevtyń «Sezim» atty óleńin oqýda da qateler jibergen jáne oqylǵan óleńniń mazmuny boıynsha komıssııanyń qoıǵan suraqtaryna jaýap bere almaǵan.

«Qoǵam jáne demokratııa» degen taqyrypta kópshilik aldynda sóz sóıleýge qajetti 15 mınýttyń ornyna úmitker 10 mınýt sóıledi. Taqyrypty ashpady, ádebı til normalaryn buzdy jáne suraqtarǵa qanaǵattanarlyqsyz jaýap berdi», - dedi M.Joldasbekov.

Otyrysqa Qazaqstan Respýblıkasy Ortalyq saılaý komıssııasynyń múshesi Lázzat Súleımen de qatysty.