Prezıdenttikke saıası partııa usynǵan kandıdattyń múmkindigi ózgelerden ozyq bolady - OSK tóraǵasy
ASTANA. 16 naýryz. QazAqparat /Aıdar Ospanalıev/ - Ortalyq saılaý komıssııasynyń tóraǵasy Qýandyq Turǵanqulovtyń pikirinshe, Prezıdent saılaýyna ózin-ózi usynǵan azamattardan góri saıası partııalar usynǵan kandıdattardyń múmkindikteri zor bolady. Ol bul pikirinbúgin jýrnalıstermen bolǵan brıfıngte bildirdi.
OSK tóraǵasynyń sózine qaraǵanda, kezekten tys Prezıdent saılaýyna qatysý úshin OSK-ǵa ótinish túsirgen 22 úmitkerdiń tek 4-ýi ǵana Prezıdenttikke kandıdat mártebesine ıe boldy jáne olardyń úsheýi saıası partııalar usynǵan kandıdattar. «Al OSK-ǵa ózin-ózi usyný jolymen ótinish bergen azamattardyń barlyǵy derlik (Prezıdenttikke kandıdat Mels Eleýsizovty aıtpaǵanda-red.) Prezıdenttikke kandıdat bolyp tirkele almady. Osydan kelip, bolashaq saıası partııalarda degen qorytyndy shyǵarýǵa bolady»,-dedi Q.Turǵanqulov.
Onyń aıtýynsha, jaǵdaıdyń bulaısha sıpat alýynyń eki sebebi bar. «Biz oǵan osy kezekten tys saılaý barysynda taǵy da kóz jetkizdik. Birinshiden, ózin-ózi usynǵan azamatqa zańda talap etilgen elimizdiń aımaqtaryndaǵy 91 myńnan astam turǵynnyń daýysyn jınaý ońaı emes. Óıtkeni mundaı kúrdeli jumysty júzege asyrý úshin kóptegen uıymdastyrý sharalaryn júzege asyrý kerek. Al saıası partııalar men qoǵamdyq uıymdardyń aımaqtarda ózderiniń fılıaldary men ókildikteri bar. Sondyqtan olar daýys jınaý jumystaryn tıisti mólsherde ári der kezinde júzege asyra alady. Kezekten tys Prezıdent saýlaýynyń naýqanynda biz osyǵan anyq kóz jetkizdik»,-dedi OSK tóraǵasy.
Sondaı-aq onyń sózinshe, saılaýǵa túsýge nıet bildirip, ózin-ózi usynǵan azamattarda saılaý qorlary ádette eki kózden qurylady.
«Ol kandıdattyń óziniń jeke qarjysy men azamattar tarapynan bólingen qaıyrymdylyq qarjysy. Al saıası partııalar usynǵan kandıdattarda aldynda atalǵan qorlardan ózge taǵy qosymsha qarjy kózi bar. Ol - saıası partııa bólgen qarjy. Mine osyndaı eki basymdyq kezekten tys Prezıdent saılaýy naýqanynda saıası partııalardyń ózgelerden múmkindikteriniń áldeqaıda joǵary bolatyndyǵyn kórsetti»,-dedi Q.Turǵanqulov.
