Prezıdenttikke kandıdattyń joǵary bilimdi bolýyn Konstıtýtsııaǵa engizý qajet - depýtat
«Memlekettik bılik júıesin aýqymdy ári túbegeıli reformalaý sheńberinde usynylyp otyrǵan Konstıtýtsııaǵa engiziletin túzetýdiń barlyǵy búgingi zamannyń jahandyq jáne óńirlik syn-qaterleri aldynda Qazaqstannyń turaqtylyǵyn aıqyndaıtyn taǵdyrsheshti sıpatqa tán ekeni sózsiz. Osyndaı keleli máselelerde Elbasymyz árqashanda halyqpen aqyldasýdy basty maqsat etetin. Osy joly da solaı boldy. Bizdiń qoǵam Elbasynyń Úndeýi men Joldaýyn talqylaý barysynda bolashaqqa baıypty boljam jasaı otyryp, óz usynys-tilekterin de jetkizdi. Sonyń biri Qazaqstan Respýblıkasynyń Prezıdenttigine kandıdatqa qoıylatyn negizgi talaptarǵa qatysty boldy. Konstıtýtsııanyń 41 babynda el Prezıdentiniń laýazymyna kandıdattarǵa qoıylatyn biliktilik ólshemderiniń ishinde joǵary bilim jaıy eskerilmegeni múldem aqylǵa qonymsyz. Tipti memlekettik qyzmettiń eń tómengi satysy úshin de joǵarǵy bilim bolýy qaralǵan, al eldi basqaratyn Prezıdenttikke kandıdat úshin bul qaralmaǵan. Sondyqtan da Prezıdenttikke kandıdatqa qoıylatyn basty talaptardyń qatarynda mindetti túrde joǵary biliminiń bolýyn Konstıtýtsııaǵa engizý qajet degen naqty usynys bar», - dedi Májilis depýtaty.
Onyń paıymynsha, bul bolashaqta oryn alýy múmkin keleńsizdiktiń aldyn-alýdyń bir joly deýge bolady.
«Biz Qazaqstannyń úshinshi jańǵyrýyn bastadyq. Búgin qaralyp otyrǵan konstıtýtsııalyq reforma bul ekonomıkalyq jaǵynan qýatty, táýelsiz jáne demokratııalyq memleket qurý jolyndaǵy alǵashqy iri qadam. Elin súıgen - eli súıgen Elbasynyń aınalasyna toptasyp, biz, qazaqstandyqtar, «Máńgilik El» qundylyqtaryn nyǵaıtý jolynda ýaqyttyń kez kelgen syn-qaterine qarsy tura alatynymyzǵa, táýelsiz Qazaqstanymyzdyń turaqty damýyn, órkendeýin jáne barlyq azamattarymyzdyń ál-aýqatynyń udaıy ósýin qamtamasyz etetinimizge, álemniń eń básekege qabiletti memleketteriniń qataryna qosylatynymyzǵa senimdimiz! Jeńiske toly ótkenimiz, jasampazdyqpen jetken búginimiz, senimge ıe erteńimiz árqashanda Elbasynyń esimimen birge jasaıtyny aqıqat. Yntymaǵy jarasqan ultymyzdyń bolashaǵy baıandy, keleshegi kemel bolsyn desek, áriptesterimdi jańa konstıtýtsııalyq reformalardy biraýyzdan qoldaýǵa shaqyramyn», - dedi Іzmuhambetov.
Aıta keteıik, birlesken otyrys barysynda «Qazaqstan Respýblıkasy Konstıtýtsııasyna ózgertýler men tolyqtyrýlar engizý týraly» QR zańynyń jobasy birinshi oqylymda talqylanýda.
